ഇസ്ലാമാബാദ്: സൗദി അറേബ്യയുമായി നേറ്റോ മോഡല് പ്രതിരോധ കരാര് ഒപ്പുവച്ച് ഇന്ത്യയെ പേടിപ്പിക്കാമെന്ന് കരുതിയ പാകിസ്ഥാന് എട്ടിന്റെ പണി. സൗദി അറേബ്യയുടെ വിലക്ക് കാരണം കോടികളുടെ ആയുധക്കച്ചവടം പാകിസ്ഥാന് നഷ്ടപ്പെടുന്നു.
പ്രതിസന്ധി ഘട്ടത്തില് പാകിസ്താനെ സാമ്പത്തികമായി സഹായിക്കുന്ന രാജ്യമായതിനാല് സൗദിയുടെ വാക്കുകള് തള്ളാനും കഴിയാതെ പാകിസ്ഥാന് വിഷമിക്കുകയാണ്. അടുത്തിടെ യുഎഇക്ക് നല്കേണ്ട കടം സൗദി നല്കിയ 500 കോടി ഡോളറില് നിന്നാണ് വീട്ടിയത്.
പക്ഷെ. സുഡാനുമായുള്ള 150 കോടിയുടെ ആയുധക്കച്ചവടം പാകിസ്ഥാന് നഷ്ടമായതും സൗദി കാരണമാണ്.സുഡാന് ആയുധം വില്ക്കരുതെന്ന് സൗദി അറേബ്യ പാകിസ്ഥാനെ വിലക്കുകയായിരുന്നു. ഇത് അനുസരിക്കാതെ പാകിസ്ഥാന് നിവൃത്തിയില്ലാതെ വന്നതോടെയാണ് സുഡാനുമായുള്ള 150 കോടിയുടെ ആയുധക്കച്ചവടം നഷ്ടമായത്. യൂറോപ്യന് രാജ്യങ്ങളില് നിന്നുള്ള സമ്മര്ദ്ദം മൂലമാണ് സുഡാന് ആയുധം വില്ക്കരുതെന്ന കര്ശനനിലപാടില് സൗദി അറേബ്യ എത്തിയത്. ഇതോടെ പാകിസ്താന് സുഡാനിലേക്ക് ആയുധം അയക്കാന് പറ്റാത്ത സ്ഥിതിയായി.
ലിബിയയുമായുള്ള കരാറും റദ്ദാക്കിയേക്കും
സുഡാനുള്ള ആയുധക്കച്ചവട സാധ്യത നഷ്ടമായ പാകിസ്ഥാന് ലിബിയയുമായുള്ള ആയുധക്കരാറും മരവിപ്പിക്കേണ്ടി വന്നേക്കുമെന്നറിയുന്നു. ലിബിയയുടെ ദേശീയ സേനയുമായി 400 കോടി ഡോളറിന്റെ കരാറാണ് പാകിസ്താന് ഒപ്പുവച്ചിരുന്നത്. ലിബിയയില് സൗദി അറേബ്യ നിലപാട് ഈയിടെ മാറ്റിയിട്ടുണ്ട്. അതിനാല് ലിബിയയ്ക്ക് ആയുധം വില്ക്കാന് പാകിസ്ഥാന് സാധിച്ചേക്കില്ല.
