ന്യൂദല്‍ഹി: സംസ്‌കൃതം അറിയുന്നത് ഭാരതത്തെ കൂടുതല്‍ ആഴത്തില്‍ മനസിലാക്കാന്‍ നമ്മെ പ്രാപ്തരാക്കുമെന്ന് ആര്‍എസ്എസ് സര്‍സംഘചാലക് ഡോ. മോഹന്‍ ഭാഗവത്. സംസ്‌കൃതഭാരതി കേന്ദ്രകാര്യാലയം ‘പ്രണവം’ ഉദ്ഘാടനം ചെയ്തശേഷം സംസാരിക്കുകയായിരുന്നു അദ്ദേഹം. സംസ്‌കൃതം വെറുമൊരു ഭാഷയല്ല, ഭാരതത്തിന്റെ ആത്മാവാണ്, രാഷ്‌ട്രത്തിന്റെ ജീവശക്തിയാണ്. ചിന്തയുടെയും ജീവിതത്തിന്റെയും സംസ്‌കാരത്തിന്റെയും ഏറ്റവും പുരാതനമായ പാരമ്പര്യമാണ്. ഇന്നും ഭാരതത്തിനുള്ളില്‍ നിലനില്‍ക്കുന്ന, ഊര്‍ജ്ജസ്വലമായി നിലനില്‍ക്കുന്ന ഒന്നാണത്. സംസ്‌കൃതം അറിയുമെങ്കില്‍, ഏത് ഭാരതീയ ഭാഷയും മനസിലാക്കാന്‍ കഴിയുമെന്നും സര്‍സംഘചാലക് പറഞ്ഞു.
പ്രധാനമന്ത്രി നരേന്ദ്ര മോദി, ശൃംഗേരി ശാരദാപീഠം ശ്രീശ്രീ വിധുശേഖര ഭാരതി സ്വാമി എന്നിവരുടെ ആശംസാ സന്ദേശങ്ങളും ഉദ്ഘാടനസമ്മേളനത്തില്‍ വായിച്ചു. സംസ്‌കൃതഭാരതി ദേശീയ പ്രസിഡന്റ് പ്രൊഫ. രമേശ്കുമാര്‍ പാണ്ഡെ, സംഘടനാ സെക്രട്ടറി ജയപ്രകാശ് ഗൗതം, ദല്‍ഹി സംസ്‌കൃത ഭാരതി ട്രസ്റ്റ് പ്രസിഡന്റ് പ്രവീണ്‍ കാന്ത് എന്നിവര്‍ സംസാരിച്ചു. ആര്‍എസ്എസ് അഖിലഭാരതീയ കാര്യകാരി അംഗം സുരേഷ് സോണി, വിഎച്ച്പി അന്താരാഷ്ട്ര രക്ഷാധികാരി ദിനേശ് ചന്ദ്ര, ബിജെപി ദേശീയ സംഘടനാ സെക്രട്ടറി ബി.എല്‍. സന്തോഷ്, കേന്ദ്രധനമന്ത്രി നിര്‍മ്മല സീതാരാമന്‍, ദല്‍ഹി സംസ്ഥാനമന്ത്രി പര്‍വേഷ് വര്‍മ്മ, അനുരാഗ് സിങ് താക്കൂര്‍ എംപി, സംസ്‌കൃതഭാരതി ദേശീയ സെക്രട്ടറി ഡോ. പ. നന്ദകുമാര്‍ തുടങ്ങിയവരുള്‍പ്പെടെ നിരവധി പ്രമുഖര്‍ ഉദ്ഘാടന ചടങ്ങിനെത്തിയിരുന്നു.
