ആലപ്പുഴ: ചേര്‍ത്തലയിലെ മെഹര്‍ മന്തി ആന്‍ഡ് ഗ്രില്‍സ് എന്ന സ്ഥാപനം ശ്രീകൃഷ്ണ ഭഗവാനെ മോശമാക്കി ചിത്രീകരിച്ചു പ്രചരിപ്പിച്ച വിഷു ആശംസ കാര്‍ഡിനെതിരെ പ്രതികരിച്ചവരെ പോലീസ് കള്ളക്കേസ് ചുമത്തി പീഡിപ്പിക്കുന്നു. ഇതിനെതിരെ ശക്തമായ പ്രക്ഷോഭ പരിപാടികള്‍ ഹൈന്ദവ സംഘടനകള്‍ സംഘടിപ്പിക്കുമെന്ന് വിഎച്ച്പി സംസ്ഥാന ജനറല്‍ സെക്രട്ടറി അഡ്വ. അനില്‍ വിളയില്‍ വാര്‍ത്താസമ്മേളനത്തില്‍ പറഞ്ഞു.
ജില്ലാ പോലീസ് മേധാവിയാണ് ഇതിന് നേതൃത്വം നല്‍കുന്നത്. നിലവിലെ സമാധാന അന്തരീക്ഷം തകര്‍ക്കാനാണ് പോലീസ് ശ്രമിക്കുന്നത്. സമാധാനപരമായി പ്രതിഷേധിച്ചവരെ കള്ളക്കേസില്‍ കുടുക്കുന്ന പോലീസ് ഭീകരത അവസാനിപ്പിക്കണം, ചേര്‍ത്തല പോലീസ് സ്വമേധയാ എടുത്തിരിക്കുന്ന കേസുകള്‍ പിന്‍വലിക്കണം. കുറ്റം ചെയ്തവര്‍ക്ക് തലോടലും കുറ്റം ചൂണ്ടിക്കാട്ടി സ്വാഭാവികമായി പ്രതികരിച്ചവര്‍ക്ക് തല്ലുമെന്ന പിണറായി സര്‍ക്കാരിന്റെ നയത്തിന്റെ ഭാഗമായാണ് ഇത്തരത്തില്‍ കേസുകള്‍ എടുത്തിരിക്കുന്നത്. സ്ത്രീകള്‍ക്കെതിരെ പോലും ചേര്‍ത്തല പോലീസ് കേസുകള്‍ എടുത്ത് അവരുടെ വീടുകളില്‍ കയറിയിറങ്ങുന്ന നടപടി ഒരിക്കലും അംഗീകരിക്കാന്‍ സാധിക്കില്ല.
കള്ളക്കേസുകള്‍ പിന്‍വലിക്കുകയും അവരില്‍നിന്ന് പിടിച്ചെടുത്തിരിക്കുന്ന മൊബൈല്‍ ഫോണുകള്‍ ഉടന്‍ തന്നെ തിരികെ നല്‍കുകയും വേണം. ചേര്‍ത്തലയില്‍ നടന്നത് ഒറ്റപ്പെട്ട സംഭവമല്ല എന്നാണ് പിന്നീട് ഉണ്ടായിട്ടുള്ള സംഭവ വികാസങ്ങള്‍ ചൂണ്ടിക്കാട്ടുന്നത്. കേരളത്തില്‍ തന്നെ നിലവില്‍ എട്ടോളം സ്ഥലങ്ങളിലുള്ള മന്തി കടകളിലും ഒരു ചെരുപ്പ് കടയിലും ഇത്തരത്തില്‍ ശ്രീകൃഷ്ണ ഭഗവാനെ അവഹേളിച്ചുകൊണ്ടുള്ള വിഷു ആശംസകള്‍ പുറത്തിറങ്ങിയിട്ടുണ്ട്. കേരളത്തിന് പുറത്ത് ബെംഗളൂരിലും സമാനസംഭവം ആവര്‍ത്തിച്ചു.
ഇപ്പോള്‍ നടന്നത് ഒരു ടെസ്റ്റ്ഡോസാണ്. പോലീസ് നടപടിക്കെതിരെ നിയമപരമായും ധാര്‍മികപരമായും പോരാട്ടങ്ങള്‍ നടത്തും. വളരെ വലിയൊരു ഹൈന്ദവ അവഹേളനം ഉണ്ടായിട്ടും മുഖ്യമന്ത്രിയും, പ്രതിപക്ഷ നേതാവും ആലപ്പുഴ എംപിയായ കെ.സി. വേണുഗോപാലും, ചേര്‍ത്തല എംഎല്‍എയായ മന്ത്രി പ്രസാദും അറിഞ്ഞ ഭാവം നടിച്ചില്ല. ഇവരുടെ നിശബ്ദത ജിഹാദി ശക്തികള്‍ക്ക് പ്രോത്സാഹനം നല്‍കുന്ന നടപടിയാണ്. ഹൈന്ദവ നിന്ദയെ പ്രോത്സാഹിപ്പിക്കുന്ന ഇത്തരം നടപടികള്‍ക്കെതിരെ പ്രതിഷേധം ശക്തമാക്കുമെന്നും അദ്ദേഹം വ്യക്തമാക്കി. ഹിന്ദുഐക്യവേദി സംസ്ഥാന സെക്രട്ടറി സി.എന്‍. ജിനു, വിഎച്ച്പി മേഖലാ സെക്രട്ടറി എം. ജയകൃഷ്ണന്‍ എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.
