ഞായറാഴ്ച്ചത്തെ മത്സരത്തോടെ ജര്മന് ഫുട്ബോള് ലീഗില് ബയേണ് വീണ്ടും കിരീടം ഉറപ്പിച്ചു. സ്വന്തം മ്യൂണിക് സ്റ്റേഡിയത്തില് വഎഫ്ബി സ്റ്റുട്ട്ഗാര്ട്ടിനെ 4-2ന് തോല്പ്പിച്ചാണ് ബയേണ് ബുന്ദെസ്ലിഗയില് 35 കിരീടങ്ങള് തികച്ചത്. നാല് വീതം മത്സരങ്ങള് കൂടി ബാക്കിയുള്ളപ്പോളാണ് ലീഗില് ജേതാക്കള് നിശ്ചയിക്കപ്പെട്ടിരിക്കുന്നത്.
ബെല്ജിയം മുന് താരം വിന്സെന്റ് കോംപാനിക്ക് കീഴിലുള്ള ബയേണ് ടീം കിരീടനേട്ടത്തില് ട്രെബിള് ആണ് സ്വപ്നം കാണുന്നത്. ബുന്ദെസ് ലിഗയ്ക്കൊപ്പം ജര്മന് കപ്പ്, ചാമ്പ്യന്സ് ലീഗ് കിരീടങ്ങളും കൈപ്പിടിയിലൊതുക്കാനാണ് ബയേണിന്റെ ശ്രമം. സീസണില് മികച്ച പ്രകടനമാണ് കോംപാനിയുടെ പരിശീലനത്തില് ഹാരി കെയ്നും കൂട്ടരും കാഴ്ച്ചവച്ചുകൊണ്ടിരിക്കുന്നത്.
ജര്മന് കപ്പില് ബയേണ് നാളെ സെമിഫൈനല് കളിക്കാനിരിക്കുകയാണ്. ബയെര് ലെവര്കുസന് ആണ് എതിരാളികള്. അവരുടെ തട്ടകത്തില് നടക്കുന്ന മത്സരത്തില് ജയിക്കാനായാല് ജര്മന് കപ്പിലും പ്രതീക്ഷ വച്ചു പുലര്ത്താം. ഒപ്പം തന്നെ ചാമ്പ്യന്സ് ലീഗ് സെമിയിലും ടീം പ്രവേശിച്ചിട്ടുണ്ട്. ഏത് പ്രതികൂലാവസ്ഥയിലും തിരിച്ചുവരവിന് ശേഷിയുള്ള റയല് മാഡ്രിഡിനെ കീഴടക്കിയാണ് ജര്മന് ടീം ക്വാര്ട്ടറില് നിന്നും മുന്നേറിയത്. അടുത്ത ചൊവ്വാഴ്ച്ച ചാമ്പ്യന്സ് ലീഗ് സെമിയുടെ ആദ്യ പാദ പോരാട്ടത്തിന് ബയേണ് കൊമ്പുകോര്ക്കാനിറങ്ങുന്നത് ഫ്രഞ്ച് കരുത്തരായ പിഎസ്ജിയുമായാണ്. നിലവിലെ ജേതാക്കളായ പിഎസ്ജി നാട്ടിലെ ഫ്രഞ്ച് ലീഗില് പതിവ് വേഗക്കുതിപ്പ് കാട്ടിയിട്ടില്ല. എങ്കിലും ചാമ്പ്യന്സ് ലീഗില് പ്രീക്വാര്ട്ടറില് ചെല്സിയെയും ക്വാര്ട്ടറില് ലിവര്പൂളിനെയും തോല്പ്പിച്ചാണ് മുന്നേറിയെത്തിയിരിക്കുന്നത്. ജര്മന് കപ്പിലെയും ചാമ്പ്യന്സ് ലീഗിലെയും സെമി കടമ്പ കടന്നാല് പോലും ഫൈനല് മത്സരം കൂടി കഴിഞ്ഞെങ്കിലെ വിന്സെന്റ് കോംപാനിയും കൂട്ടരും തുടങ്ങിവച്ച ചിരിക്ക് ട്രെബിള് വിജയത്തിന്റെ പൂര്ണത കൈവരികയുള്ളൂ.
