ഡര്ബന്: ഭാരത വനിതകള്ക്ക് രണ്ടാം ട്വന്റി20യിലും തോല്വി. ദക്ഷിണാഫ്രിക്കന് പര്യടനത്തിലെ രണ്ടാം മത്സരത്തില് ആതിഥേയര് എട്ട് വിക്കറ്റിന്റെ വിജയമാണ് നേടിയത്. ഇതോടെ അഞ്ച് മത്സര പരമ്പരയില് ദക്ഷിണാഫ്രിക്ക 2-0ന് മുന്നില് തുടരുകയാണ്. ബുധനാഴ്ച്ചയാണ് മൂന്നാം മത്സരം.
മത്സരത്തില് ആദ്യം ബാറ്റ് ചെയ്ത് 20 ഓവറില് 147 റണ്സില് ഭാരതം ഓള് ഔട്ടായി. ദക്ഷിണാഫ്രിക്ക 17 പന്തുകള് ബാക്കിനില്ക്കെ രണ്ട് വിക്കറ്റ് നഷ്ടത്തില് വിജയം സ്വന്തമാക്കി.
ഭാരതം മുന്നില് വച്ച 148 റണ്സിലേക്ക് അനായാസം സ്കോര് ചെയ്ത ദക്ഷിണാഫ്രിക്കയ്ക്ക് ഓപ്പണര്മാരെ മാത്രമാണ് നഷ്ടപ്പെട്ടത്. അര്ദ്ധ സെഞ്ചുറി തികച്ച ക്യാപ്റ്റന് ലോറ വോള്വാര്ഡ്റ്റും(54) സൂന് ലൂസും(57) വിജയം ഉറപ്പാക്കിയ ശേഷമാണ് പുറത്തായത്. ഇരുവരും ചേര്ന്ന ആദ്യ വിക്കറ്റില് 12 ഓവറില് 106 റണ്സുകള് നേടി. ടസ്മിന് ബ്രിറ്റ്സും(20) അന്നെറീ ഡേര്ക്ക്സെനും(12) പുറത്താകാതെ നിന്നു. ഭാരതത്തിനായി ശ്രേയങ്ക പാട്ടീല് രണ്ട് വിക്കറ്റുകള് വീഴ്ത്തി.
തുടര്ച്ചയായ രണ്ടാം മത്സരത്തിലും ഭാരതത്തിനായിരുന്നു ടോസ്. ഓപ്പണര് ഷഫാലി വര്മയുടെ അര്ദ്ധ സെഞ്ചുറി(57) മാത്രമാണ് ഭാരത ഇന്നിങ്സില് എടുത്തുപറയാനുണ്ടായിരുന്നത്. താരത്തിന് പുറമെ അനുഷ്ക ശര്മ(28) മാത്രമാണ് കുറച്ചെങ്കിലും പൊരുതിനോക്കിയത്. ആതിഥേയര്ക്കുവേണ്ടി ടുമി സെഖുഖൂനെയും ക്ലോ േ്രട്യാനും മൂന്ന് വീതം വിക്കറ്റുകള് വീഴ്ത്തി. ക്ലോ േ്രട്യാന് കളിയിലെ താരമായി.
