കോഴിക്കോട്: വടകരയില്‍ ലോണ്‍ ആപ്പുകാരുടെ ഭീഷണിയെ തുടര്‍ന്ന് യുവാവിനെ കാണാതായതായി പരാതി. ആയഞ്ചേരി സ്വദേശി വിഷ്ണു പ്രകാശിനെ (25) ആണ് ഈ മാസം 13 മുതല്‍ കാണാതായത്.
ലോണ്‍ ആപ്പില്‍ നിന്നും വിഷ്ണു പ്രകാശ് 10,000 രൂപ വായ്‌പ എടുത്തിരുന്നുവെന്നും തിരിച്ചടവ് മുടങ്ങിയതിനാല്‍ നിരന്തരം ഭീഷണി കോളുകള്‍ വന്നിരുന്നുവെന്നും കുടുംബം പറഞ്ഞു. വീട്ടില്‍ നിന്നും ബാങ്കിലേക്ക് പോകുകയാണെന്ന് പറഞ്ഞാണ് യുവാവ് ഇറങ്ങിയത്. എന്നാല്‍ പിന്നീട് മടങ്ങിയെത്തിയില്ല.
വിഷ്ണുവിന്റെ ചിത്രങ്ങള്‍ മോര്‍ഫ് ചെയ്ത രീതിയില്‍ ലോണ്‍ ആപ്പുകാര്‍ ബന്ധുകള്‍ക്കടക്കം അയച്ചിരുന്നു.വിഷണുവിന്റെ ഫോണ്‍ സ്വിച്ച് ഓഫ് ചെയ്ത നിലയിലാണ്. സംഭവത്തില്‍ കുടുംബം വടകര പൊലീസില്‍ പരാതി നല്‍കി.പൊലീസ് കേസെടുത്ത് അന്വേഷണം ആരംഭിച്ചു.
