കൊല്ക്കത്ത: ഇന്ത്യന് ഫുട്ബോള് ലീഗില് ഇന്ന് ഗോകുലം കേരള എഫ് സി-ഡയമണ്ട് ഹാര്ബര് എഫ് സി പോരാട്ടം. വൈകിട്ട് നാലിന് കൊല്ക്കത്തയിലെ കല്യാണി സ്റ്റേഡിയത്തില് നടക്കുന്ന മത്സരത്തില് വിജയത്തില് കുറഞ്ഞതൊന്നും ഗോകുലത്തിന് മതിയാവില്ല.
നിലവില് 8 കളികളില് നിന്ന് രണ്ട് വീതം വിജയവും സമനിലയും നാലെണ്ണത്തില് പരാജയപ്പെട്ടു. എട്ട് പോയിന്റുമായി ടീം എട്ടാം സ്ഥാനത്താണ്. ഇന്ന് ടീം ജയിക്കുന്നതോടൊപ്പം നിലവില് 9 പോയന്സുള്ള ഐസ്വാള് എഫ് സിയുടെയും ഡെമ്പോ എസ് സിയുടെയും മത്സരങ്ങള് സമനിലയോ തോല്ക്കുകയോ ചെയ്തെങ്കില് മാത്രമേ ടീമിന് സൂപ്പര് സിക്സ് റൗണ്ടില് പ്രവേശിക്കാനാവു. അല്ലാത്തപക്ഷം അവസാന നാലു സ്ഥാനക്കാരുടെ റെലിഗെഷന് റൗണ്ട് മത്സരങ്ങളാവും ടീം കളിക്കേണ്ടി വരുക
.
വിദേശ താരങ്ങളുടെ പരിക്കും, പകരം വന്ന പുതിയ താരങ്ങള് ഗോള് കണ്ടെത്താന് പ്രയാസപ്പെടുന്നതുമാണ് നിലവില് ടീം നേരിടുന്ന പ്രശ്നം. ഡിഫെന്സിലെ പോരായ്മകളും മറ്റൊരു ഘടകമാണ്. സ്ക്വാഡ് സ്ട്രെങ്ങ്തില് ഗോകുലത്തിന് ഉള്ള മേല്കൈ കളിക്കളത്തില് കാണാതെ പോവുന്നതാണ് ടീമിന്റെ ഈ സീസണിലെ നിലവിലെ പൊസിഷന് കാരണം. എന്നിരുന്നാല് കൂടെ ഇന്നത്തെ മത്സരത്തില് ഗോകുലത്തെ പൂര്ണമായും എഴുതിത്തള്ളാനാവില്ല.
