കൊൽക്കത്ത : ബിജെപി അധികാരത്തിൽ വന്നാൽ പശ്ചിമ ബംഗാളിൽ ലവ് ജിഹാദ്, ബഹുഭാര്യത്വം എന്നിവ നിരോധിക്കുമെന്ന് കേന്ദ്ര ആഭ്യന്തര മന്ത്രി അമിത് ഷാ. മാൾഡ ജില്ലയിലെ മാണിക്ചക്കിൽ പൊതുയോഗത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം .
‘ ബിജെപി അധികാരത്തിലേറിയാൽ ബംഗാളിൽ ഏകീകൃത സിവിൽ കോഡ് നടപ്പിലാക്കും. നിലവിൽ ചിലർക്ക് ഒരേസമയം നാല് വിവാഹങ്ങൾ നടത്താൻ അനുവാദമുണ്ട്. ബിജെപി സർക്കാർ രൂപീകരിച്ചതിനുശേഷം, ഏകീകൃത സിവിൽ കോഡ് നടപ്പിലാക്കുന്നതിലൂടെ ഈ സമ്പ്രദായം നിർത്തലാക്കും. ‘ലവ് ജിഹാദ്’, ‘ലാൻഡ് ജിഹാദ്’ തുടങ്ങിയ പ്രവർത്തനങ്ങൾ സംസ്ഥാനത്ത് പൂർണ്ണമായും നിർത്തലാക്കും.
കഴിഞ്ഞ പതിനഞ്ച് വർഷത്തിനിടയിൽ നടന്ന അഴിമതി കേസുകളെക്കുറിച്ച് അന്വേഷണം നടത്തും. രക്ഷപ്പെടുമെന്ന് ആരും കരുതരുത് . തിരഞ്ഞെടുപ്പ് ഫലം പ്രഖ്യാപിച്ച് പുതിയ സർക്കാർ രൂപീകരിച്ച ശേഷം, അഴിമതിയിൽ ഉൾപ്പെട്ട എല്ലാവരെയും ജയിലിൽ കയറ്റും.
വോട്ടെടുപ്പിനിടെ സാമൂഹിക വിരുദ്ധർ കുഴപ്പങ്ങൾ സൃഷ്ടിക്കാൻ ശ്രമിച്ചാൽ കർശന നടപടി സ്വീകരിക്കും . അത്തരം ആളുകൾ പോളിംഗ് ദിവസം വീട്ടിൽ തന്നെ കഴിയണം . അല്ലെങ്കിൽ അനന്തരഫലങ്ങൾ നേരിടേണ്ടിവരും. ബാബർ തകർത്ത രാമക്ഷേത്രം പ്രധാനമന്ത്രി മോദിയുടെ നേതൃത്വത്തിൽ പുനർനിർമ്മിച്ചു. ഇനി രാജ്യത്ത് ഒരിടത്തും ബാബറി മസ്ജിദ് നിർമ്മിക്കാൻ അനുവദിക്കില്ല. “ അമിത് ഷാ പറഞ്ഞു.
