ടെഹ്റാന്‍ :ഹോര്‍മൂസ് കടലിടുക്കിലൂടെ ഇനി ഒരു ചരക്കുകപ്പലിനെയും കടത്തിവിടില്ലെന്ന അമേരിക്കന്‍ പ്രസിഡന്‍റ് ട്രംപിന്റെ വീരവാദം പൊളിച്ച് ചൈന. അമേരിക്ക ഏര്‍പ്പെടുത്തിയ ഉപരോധം ലംഘിച്ച് ചൈനീസ് ചരക്കുക്കപ്പല്‍ ഹോര്‍മൂസ് കടലിടുക്ക് കടന്നു യാത്ര ചെയ്തു.
അമേരിക്കന്‍ ഉപരോധത്തിന് ശേഷം സംഘര്‍ഷ മേഖലയായ ഹോര്‍മൂസ് കടക്കുന്ന ആദ്യ കപ്പലാണ് ചൈനയുടേത്. ഇതോടെ അമേരിക്കയുടെ ഭീഷണി പരാജയപ്പെട്ടുവെന്ന് ഇറാന്‍ ഭരണകൂടം പരിഹസിച്ചു.
ഷാങ്ഹായ് ഷുവാന്റണ്‍ ഷിപ്പിംഗ് കമ്പനിയുടെ ഉടമസ്ഥതയിലുള്ള ‘റിച്ച് സ്റ്റാറി’ (Rich Starry) എന്ന ടാങ്കര്‍ കപ്പലാണ് ഉപരോധം മറികടന്നത്. ഈ കപ്പല്‍ ഇപ്പോള്‍ ഹോര്‍മുസ് കടന്ന് ഒമാന്‍ ഉള്‍ക്കടലില്‍ എത്തിയിട്ടുണ്ട്. മലാവി പതാകയേന്തിയ കപ്പല്‍ ആദ്യം പിന്തിരിഞ്ഞു പോയെങ്കിലും, കപ്പലില്‍ ചൈനീസ് ജീവനക്കാരുണ്ടെന്ന വിവരം വ്യക്തമായതോടെ തടസ്സങ്ങളില്ലാതെ യാത്ര തുടരാന്‍ സാധിച്ചു എന്നാണ് റിപ്പോര്‍ട്ട്.
ഇറാനെ സഹായിച്ചതിന്റെ പേരില്‍ രണ്ട് വര്‍ഷം മുമ്പ് അമേരിക്ക കരിമ്പട്ടികയില്‍പ്പെടുത്തിയ കപ്പലാണിത്. ഹോര്‍മൂസ് കടക്കുന്ന ഇറാന്‍ ബന്ധമുള്ള കപ്പലുകളെ തകര്‍ക്കുമെന്ന് പ്രസിഡന്‍റ് ഡൊണാള്‍ഡ് ട്രംപ് നേരത്തെ മുന്നറിയിപ്പ് നല്‍കിയിരുന്നു. പാകിസ്താനില്‍ നടന്ന ചര്‍ച്ചകള്‍ പരാജയപ്പെട്ടതിനെത്തുടര്‍ന്നാണ് ട്രംപ് ഉപരോധം കടുപ്പിച്ചത്.
