കൊല്ലം: പൊലീസ് സ്റ്റേഷനിലേക്ക് വിളിപ്പിച്ചയാള് തീ കൊളുത്തി ജീവനൊടുക്കി. കഴിഞ്ഞ രാത്രി തിരുവനന്തപുരം മെഡിക്കല് കോളജാശുപത്രിയിലായിരുന്നു മരണം. പിറവന്തൂര് കുരിയോട്ടുമല ആദിവാസി ഉന്നതിയിലെ സുരേഷ് (36) ആണ് ആത്മഹത്യ ചെയ്തത്.
പുനലൂര് പൊലീസ് സ്റ്റേഷന് മുന്നിലായിരുന്നു യുവാവ് സ്വയം തീ കൊളുത്തിയത്.ഗുരുതര പൊള്ളലേറ്റ യുവാവിനെ മെഡിക്കല്കോളേജ് ആശുപത്രിയിലെത്തിച്ചു.
കുടുംബ പ്രശ്നത്തെ തുടര്ന്ന് ഭാര്യ ചെല്ലമ്മ (24)യുടെ പരാതിയിലാണ് പൊലീസ് ഇരുവരെയും ഇന്നലെ രാവിലെ സ്റ്റേഷനിലേക്ക് വിളിപ്പിച്ചത്.
ഇയാള് സ്റ്റേഷനില് എത്തുമ്പോള് ഭാര്യ അവിടെയുണ്ടായിരുന്നു. ഈ സമയം സ്റ്റേഷനിലേക്കുള്ള വഴിയില് വച്ച് ഇയാള് കൈവശം കരുതിയിരുന്ന മണ്ണെണ്ണ ദേഹത്ത് ഒഴിച്ച് തീ കൊളുത്തിയശേഷം സ്റ്റേഷനിലേക്ക് ഓടിക്കയറുകയായിരുന്നു.
സ്റ്റേഷനിലുണ്ടായിരുന്ന പൊലീസുകാര് വെള്ളം ഒഴിച്ച് തീ കെടുത്താന് ശ്രമിച്ചു.കുഴഞ്ഞുവീണ സുരേഷിനെ പൊലീസുകാര് ഉടന്തന്നെ പുനലൂര് താലൂക്ക് ആശുപത്രിയില് പ്രവേശിപ്പിച്ചു.പൊള്ളല് ഗുരുതരമായതിനാല് പ്രാഥമിക ചികിത്സയ്ക്കുശേഷം മെഡിക്കല് കോളേജ് ആശുപത്രിയില് എത്തിച്ച് തീവ്രപരിചരണ വിഭാഗത്തില് പ്രവേശിപ്പിക്കുകയായിരുന്നു.
ഭാര്യയെയും മക്കളെയും നിരന്തരം ഉപദ്രവിക്കുന്ന സുരേഷിനെതിരെ മുമ്പും ഭാര്യ പരാതി നല്കിയിട്ടുണ്ടെന്ന് പൊലീസ് പറഞ്ഞു.
