ഇസൈജ്ഞാനി ഇളയരാജയുടെ സംഗീതത്തില്‍ പി ജയചന്ദ്രന്‍ ആലപിച്ച് ഏറെ ആരാധകരെ സൃഷ്ടിച്ച വിഖ്യാത ഗാനമാണ് ‘രാസാത്തി ഉന്നെ കാണാതെ നെഞ്ച്‌’. 1994ല്‍ പുറത്തിറങ്ങിയ ‘വൈദേഹി കാത്തിരുന്താള്‍’ എന്ന ചിത്രത്തിലേതായിരുന്നു ആ പാട്ട്. ആ ഗാനം സൃഷ്ടിച്ച ഒരപൂര്‍വ അനുഭവത്തെക്കുറിച്ച് സംഗീത സംവിധായകന്‍ ഇളയരാജ പങ്കുവച്ചിട്ടുണ്ട്.
‘രാസാത്തി ഉന്നെ’ എന്ന പാട്ടുകേട്ട് കാട്ടില്‍ നിന്ന് ആനക്കൂട്ടം ഇറങ്ങിവരുമായിരുന്നുവെന്നാണ് ഇളയരാജ പറഞ്ഞത്. അദ്ദേഹത്തിന്റെ വാക്കുകള്‍ ഇങ്ങനെ. ‘തമിഴ്‌നാട്ടിലെ കമ്പത്ത് കാടിനോട് ചേര്‍ന്ന് ഒരു തിയേറ്ററില്‍ സിനിമ പ്രദര്‍ശിപ്പിച്ച് വരികയായിരുന്നു. ‘രാസാത്തി ഉന്നെ’ എന്ന പാട്ട് തുടങ്ങിയാല്‍ ആനകള്‍ കാടിറങ്ങി ഗ്രാമത്തിലേക്കെത്തും.
അവ തുമ്പിക്കൈ ഉയര്‍ത്തിയും ചെവിയാട്ടിയുമൊക്കെ നില്‍ക്കും. പാട്ട് കഴിഞ്ഞാല്‍ അവ തിരികെ പോകും. സിനിമ തിയേറ്ററില്‍ നിന്ന് മാറുംവരെ ഇത് തുടര്‍ന്നു’ – ഇളജയരാജ പറഞ്ഞു.ആ പാട്ട് പാടാനായതില്‍ ഏറെ സന്തോഷവും അഭിമാനവുമുണ്ടെന്നും സര്‍വേശ്വരനോട് അതില്‍ നന്ദിയുണ്ടെന്നും പി ജയചന്ദ്രന്‍ പറഞ്ഞിട്ടുണ്ട്.
