തിരുവനന്തപുരം: വോട്ടിന് വേണ്ടി പണം നല്കിയെന്ന ആരോപണത്തില് ശോഭാ സുരേന്ദ്രനെ ജില്ലാകളക്ടര് കുറ്റവിമുക്തയാക്കിയിട്ടും മലയാള മനോരമയും മാധ്യമം പത്രവും ശോഭാ സുരേന്ദ്രനെതിരെ സമൂഹമാധ്യമങ്ങളില് നുണ പ്രചരിപ്പിക്കുന്നു. ഒരു ആരോപണത്തില് സ്ഥാനാര്ത്ഥിയെ കുടുക്കുക, പിന്നീട് അതിനെ മാധ്യമങ്ങളിലൂടെയും സമൂഹമാധ്യമങ്ങളിലൂടെയും പ്രചരിപ്പിക്കുക എന്ന തന്ത്രമാണ് കോണ്ഗ്രസിന്റെ തെരഞ്ഞെടുപ്പ് പ്രചാരകന് സുനില് കനഗോലു പയറ്റിയത്. ഇവിടെ കോണ്ഗ്രസിന്റെ തെരഞ്ഞെടുപ്പ് തന്ത്രജ്ഞനും ബിജെപി വിരുദ്ധ മുഖ്യധാരാമാധ്യമങ്ങളും കൈകോര്ത്ത ഒരു വലിയ ഗൂഢാലോചന തന്നെയാണിതെന്ന് വിലയിരുത്തപ്പെടുന്നു.
തെലുങ്കാനയിലും കര്ണ്ണാടകയിലും ഉള്പ്പെടെ തെരഞ്ഞെടുപ്പുകളില് പയറ്റുന്ന അതേ തന്ത്രമാണ് പാലക്കാട് പയറ്റിയത്. തോല്ക്കുമെന്ന് കരുതുന്ന മണ്ഡലങ്ങളില് വിജയം നേടാന് അവസാനനിമിഷം പുറത്തെടുക്കുന്ന തന്ത്രമാണ് ശോഭാ സുരേന്ദ്രനെതിരെ പയറ്റിയത്. മനോരമ, മാധ്യമം എന്നീ പത്രങ്ങളിലൂടെ നടത്തുന്ന ദുഷ്പ്രചാരണവും ഈ തന്ത്രത്തിന്റെ ഭാഗമാണ്.
ഒരു മര്യാദയുമില്ലാതെ ശോഭാ സുരേന്ദ്രന് ഒരാള്ക്ക് 5,000 നല്കിയെന്ന രീതിയിലാണ് മാധ്യമം വാര്ത്തകള് പുറത്തുവിടുന്നത്. ഈ വാര്ത്തകളാകട്ടെ സമൂഹമാധ്യമങ്ങളില് വ്യാപകമായി ഗ്രൂപ്പുകള് പ്രചരിപ്പിക്കുകയും ചെയ്യുകയാണ്. ശോഭാ സുരേന്ദ്രന് അമ്പലങ്ങള്ക്ക് 50,000 രൂപ വരെ നല്കിയെന്നും മാധ്യമം പത്രം നുണ പറയുന്നു. ഇതുവഴി ന്യൂനപക്ഷത്തെ ശോഭാ സുരേന്ദ്രനെതിരെ തിരിക്കുക എന്ന ഗൂഢോദ്ദേശ്യവും ഉണ്ട്.
മനോരമ പത്രവും ശോഭ സുരേന്ദ്രന് പണം നല്കി എന്ന രീതിയിലാണ് വാര്ത്ത പുറത്തുവിട്ടിരിക്കുന്നത്. ജില്ലാ കളക്ടര് അങ്ങിനെ സംഭവിച്ചിട്ടില്ല എന്ന് അന്വേഷണത്തില് കണ്ടെത്തിയിട്ടും മനോരമ ഇതേ വാര്ത്ത ആവര്ത്തിക്കുകയാണ്. ഈ വാര്ത്തയാകട്ടെ തല്പരഗ്രൂപ്പുകള് സമൂഹമാധ്യമങ്ങളില് പ്രചരിപ്പിക്കുകയും ചെയ്യുകയാണ്.
