കൊച്ചി : പ്രധാനമന്ത്രി നരേന്ദ്ര മോദി മാതൃകയാക്കേണ്ട നേതാവാണെന്ന് ട്വന്റി-ട്വന്റി അധ്യക്ഷന് സാബു എം ജേക്കബ്.അദ്ദേഹം നീതി വിട്ട് പെരുമാറുന്ന ആളല്ല.ബിജെപിയിലുള്ള നേതാക്കള് തെറ്റ് ചെയ്താല് അത് ഒരിക്കലും അംഗീകരിക്കാത്ത നേതാവാണ് മോദി എന്നും സാബു എം ജേക്കബ്.
മുഖ്യമന്ത്രി പിണറായി വിജയന് ആഡംബര ജീവിതം നയിക്കുന്ന ആളാണ്.വിദേശത്ത് പോകുമ്പോള് ലക്ഷങ്ങള് മുടക്കിയുള്ള ഭക്ഷണമാണ് അദ്ദേഹം കഴിക്കുന്നത്. ഒരു രാത്രി മാത്രം താമസിക്കാനായി 3-4 ലക്ഷം രൂപ വില വരുന്ന മുറികളാണ് പിണറായി തിരഞ്ഞെടുക്കാറുള്ളത്. പാരീസില് അദ്ദേഹം ബുക്ക് ചെയ്ത മുറിയുടെ വില ഏഴ് ലക്ഷമാണ്. അതെ ഹോട്ടലില് തന്നെ താമസിച്ച തനിക്ക് അത് അംഗീകരിക്കാനായില്ല. ഇത് തുറന്നുപറഞ്ഞപ്പോള് അദ്ദേഹം ആ ഹോട്ടലില് നിന്ന് മാറി.വിമര്ശിച്ചതിന്റെ പേരില് തന്നോട് അദ്ദേഹത്തിന് നീരസമുണ്ടായെന്നും സാബു എം ജേക്കബ് പറഞ്ഞു.
പിണറായി വിജയന് മുഖ്യമന്ത്രി ആയതിന് ശേഷം ആദ്യ ദിവസങ്ങളില് വളരെ പ്രതീക്ഷയുണ്ടായിരുന്നു. തനിക്ക് എന്തായാലും രാഷ്ട്രീയത്തിലേക്ക് ഇറങ്ങി കേരളത്തെ രക്ഷിക്കാനാകില്ല. അങ്ങിനെയാണ് തന്റെ മനസിലുള്ള ആശയങ്ങള് പിണറായി വിജയനിലൂടെ നടപ്പിലാക്കി കേരളത്തെ രക്ഷപ്പെടുത്തി എടുക്കാം എന്ന ഉദ്ദേശത്തോടെയാണ് അദ്ദേഹത്തിനൊപ്പം കൂടിയത്. എന്നാല് അടുത്തപ്പോള് അദ്ദേഹത്തിന്റെ പ്രവര്ത്തനങ്ങളില് കുറച്ചധികം ദുരൂഹത തോന്നി. തന്റെ വീട്ടില് വെച്ച് പരിചയപ്പെട്ട് സംസാരിച്ച വ്യക്തിയല്ല യഥാര്ത്ഥ പിണറായി എന്ന് തോന്നി. പലപ്പോഴും അദ്ദേഹത്തോട് ഇക്കാര്യങ്ങള് പറഞ്ഞു. ഒരിക്കലും പിണറായി കേരളത്തെ രക്ഷിക്കാന് പോകുന്നില്ലെന്ന പരിപൂര്ണ ബോധ്യം വന്നപ്പോഴാണ് താന് വിട്ടുപോകുന്നത്.
ബിജെപി മറ്റ് സംസ്ഥാനങ്ങളില് നടപ്പിലാക്കിയിട്ടുള്ള വികസന മാതൃക കണ്ടിട്ടാണ് എന്ഡിഎയില് ചേര്ന്നത്.ട്വന്റി -20 യുടെ വികസന ക്ഷേമ മാതൃകയും ബിജെപിയുടേതും കൂടി ചേര്ന്നാല് വലിയ മാറ്റം കേരളത്തില് കൊണ്ട് വരാന് പറ്റും. ഒരിക്കലും എല്ഡിഎഫിനെയോ യുഡിഎഫിനെയോ എതിര്ക്കാന് ആയിരുന്നില്ല ലക്ഷ്യം.
ബിജെപി വര്ഗീയത ഇളക്കുന്നുവെന്ന് ആരോപിക്കുന്നത് കേരളത്തിലെ കമ്മ്യൂണിസ്റ്റുകാരും കോണ്ഗ്രസുമാണ്.എന്നാല്, എന്ത് വര്ഗീയതയാണ് ബിജെപി കൊണ്ടുവന്നിട്ടുള്ളത്. അങ്ങിനെ ഒരു തൊട്ടുകൂടായ്മ ഉണ്ടെങ്കില് എന്തുകൊണ്ടാണ് അവര് ക്രിസ്ത്യാനിയായ തന്നെ കൂടെ നിര്ത്തിയത്.
വ്യവസായവും പൊതുപ്രവര്ത്തനവും ഒന്നിച്ചാണ് കൊണ്ടുപോകുന്നത്. ഒരിക്കലും സ്ഥാനമാനങ്ങള് ആഗ്രഹിച്ചിട്ടില്ല. മന്ത്രി ആകണമെങ്കില് പണ്ടേ അവസരം ഉണ്ടായിരുന്നു. മന്ത്രി ആയ സാബു ജേക്കബിനെക്കാള് ശക്തനാണ് മന്ത്രിയാകാത്ത സാബു ജേക്കബ്. ജനങ്ങള്ക്ക് വേണ്ടിയും നാടിന് വേണ്ടിയും എല്ലാ മേഖലകളിലുമായും തനിക്ക് ഇപ്പോള് പ്രവര്ത്തിക്കാന് കഴിയും.
