തിരുവനന്തപുരം: അന്താരാഷ്‌ട്ര ബഹിരാകാശ നിലയത്തിലെ തന്റെ അനുഭവങ്ങളെക്കുറിച്ചും ബഹിരാകാശ പര്യവേക്ഷണത്തിന്റെ പ്രാധാന്യത്തെക്കുറിച്ചും ബഹിരാകാശ യാത്രികന്‍ ശുഭാംശു ശുക്ല വിദ്യാര്‍ത്ഥികളുമായി സംവദിച്ചു. ഇന്നലെ തിരുവനന്തപുരത്ത് ലോക് ഭവനില്‍ നടന്ന പരിപാടിയിലാണ് ഭാരത വ്യോമസേന ഗ്രൂപ്പ് ക്യാപ്റ്റനും ആക്‌സിയം മിഷന്‍ 4 ന്റെ ഭാഗമായ ബഹിരാകാശ യാത്രികനുമായ ശുഭാംശു ശുക്ല ബഹിരാകാശ യാത്രാവിശേഷങ്ങള്‍ പങ്കുവച്ചത്.
ബഹിരാകാശ പര്യവേഷണത്തിനായുള്ള ദൗത്യങ്ങള്‍ സമൂഹത്തെ എങ്ങനെ സഹായിക്കുമെന്ന് തുടക്കത്തില്‍ നമുക്ക് അറിയില്ലായിരുന്നു. എന്നാല്‍ സങ്കീര്‍ണമായ ഇത്തരം ദൗത്യങ്ങള്‍ സമൂഹത്തിന്റെ ഭാഗമായി മാറുന്നതാണ് ഇന്ന് കാണുന്നത്. ബഹിരാകാശ യാത്രയ്‌ക്കുവേണ്ടി 2020 ഫെബ്രുവരി മുതല്‍ പരിശീലനം നടത്തുന്നുണ്ട്. വ്യോമസേനയിലെ പരിശ്രമവും തുടര്‍ച്ചയായി നടത്തിയ പരിശീലനവുമാണ് ബഹിരാകാശയാത്രികനാക്കി മാറ്റിയത്, അദ്ദേഹം പറഞ്ഞു. നമ്മുടെ തലച്ചോറ് വളരെ ശക്തമായ ഒരു ഉപകരണമാണ്. അതിനെ വേണ്ട രീതിയില്‍ ഉപയോഗിച്ചാല്‍ ഏതുകാര്യവും നേടിയെടുക്കാന്‍ കഴിയും.
കുടുംബവുമായി സംസാരിക്കാന്‍ ലഭിക്കുന്ന കുറച്ച് സമയം മാത്രമായിരുന്നു പുറംലോകവുമായുള്ള ഏക ബന്ധം. ഗഗന്‍യാന്‍ പോലുള്ള ദൗത്യങ്ങള്‍ക്ക് ഇസ്രോയിലെ ശാസ്തജ്ഞര്‍ കഠിനമായി പരിശ്രമിക്കുകയാണ്. അങ്ങേയറ്റം വെല്ലുവിളി നിറഞ്ഞതും സങ്കീര്‍ണവുമായ ഈ ദൗത്യങ്ങള്‍ പുതിയ തലമുറയ്‌ക്ക് ഏറെ ഗുണകരമാവുമെന്നും അദ്ദേഹം പറഞ്ഞു. 1984ല്‍ നമ്മുടെ ആദ്യത്തെ ബഹിരാകാശയാത്രികനായ രാകേഷ് ശര്‍മ്മയോട് അന്നത്തെ പ്രധാനമന്ത്രി ചോദിച്ചതാണ് ‘മുകളില്‍ നിന്ന് ഭാരതത്തെ കാണാന്‍ എങ്ങനെയുണ്ട് എന്ന്. ‘സാരെ ജഹാന്‍ സെ അച്ഛാ’ എന്നായിരുന്നു അദ്ദേഹത്തിന്റെ മറുപടി. എന്നാല്‍ ഇന്ന് ആധുനിക സാങ്കേതികവിദ്യ ഉള്ളതിനാല്‍ എനിക്ക് നിങ്ങളോട് അത് വിവരിക്കേണ്ടതില്ല, നിങ്ങള്‍ക്ക് കാണിച്ചുതരാന്‍ കഴിയുമെന്നും അദ്ദേഹം പറഞ്ഞു.
വരുംതലമുറയിലെ കുട്ടികള്‍ക്ക് ഭാരതത്തിന്റെ ബഹിരാകാശ നേട്ടങ്ങളെക്കുറിച്ചും രാജ്യത്തിന്റെ വികസനത്തെക്കുറിച്ചും കൃത്യമായ ധാരണ നല്‍കാനാണ് ഇത്തരം പരിപാടികള്‍ സംഘടിപ്പിക്കുന്നതെന്ന് ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കര്‍ പറഞ്ഞു. ബഹിരാകാശ വിശേഷങ്ങള്‍ പങ്കുവച്ച യുവാക്കളുടെയും മുതിര്‍ന്നവരുടെയും ഐക്കണായി മാറിയ ഗ്രൂപ്പ് ക്യാപ്റ്റന്‍ ശുഭാംശു ശുക്ലയ്ക്ക് ഗവര്‍ണര്‍ നന്ദി പറഞ്ഞു. നമ്മുടെ രാജ്യം ലോകത്തിന് മുന്നില്‍ ‘സാരേ ജഹാന്‍ സെ അച്ഛാ’ ആയി നിലകൊള്ളണമെങ്കില്‍ നമ്മള്‍ കഠിനാധ്വാനം ചെയ്യണമെന്നും ഗവര്‍ണര്‍ പറഞ്ഞു.
ബഹിരാകാശ നിലയത്തിലെ ജീവിതചര്യകളും ഭാരതത്തിന്റെ രാത്രികാല ദൃശ്യങ്ങളും പ്രഭാഷണത്തിനിടെ അദ്ദേഹം പ്രദര്‍ശിപ്പിച്ചു. നിരവധി കുട്ടികളുടെ ചോദ്യങ്ങള്‍ക്കും അദ്ദേഹം മറുപടി നല്‍കി. നാവികസേന ലഫ്. കമാന്‍ഡര്‍ സാഹില്‍ ഫോന്‍സ സംസാരിച്ചു. ഭാരതാംബയുടെ ചിത്രത്തിന് മുന്നിലെ നിലവിളക്കില്‍ ശുഭാംശു ശുക്ല തിരിതെളിയിച്ചു. പ്രഭാഷണം ശ്രവിക്കാനെത്തിയ വിദ്യാര്‍ത്ഥികള്‍ക്കൊപ്പം ഫോട്ടോയെടുത്ത ശേഷമാണ് ശുഭാംശു ശുക്ല മടങ്ങിയത്.
