പത്തനംതിട്ട: സിപിഎം റാന്നി ഏരിയാ കമ്മിറ്റി അംഗം അലന് മാത്യുവിനെ (27) പീഡന കേസില് നിന്ന് രക്ഷപ്പെടുത്താന് പ്രാദേശിക നേതൃത്വം നടത്തിയ ശ്രമം തെരഞ്ഞെടുപ്പിനിടെ പാര്ട്ടിയെ പ്രതിരോധത്തിലാക്കുന്നു. പ്രചാരണം ചൂടുപിടിക്കുന്നതിനിടെ അതിജീവിത തന്നെയാണ് ആരോപണവുമായി രംഗത്ത് വന്നത്.
വിവാഹ വാഗ്ദാനം നല്കി അഞ്ച്വര്ഷം മുമ്പാണ് റാന്നി ചേത്തയ്ക്കല് ചേക്കോട്ട് അലന് മാത്യു തന്നേക്കാള് പ്രായമുള്ള യുവതിയുമായി ബന്ധം സ്ഥാപിച്ചത്. വാഗമണ് അടക്കം പല സ്ഥലങ്ങളിലും എത്തിച്ച് അലന് മാത്യു യുവതിയെ പീഡിപ്പിച്ചു. ഒടുവില് ഗര്ഭിണിയാണെന്ന് അറിഞ്ഞതോടെ അലന് അകന്നു. എന്നാല് പ്രശ്നം വഷളാകുമെന്ന് മനസിലായതോടെ ഇയാള് വിവാഹത്തിന് സമ്മതിച്ചു. എന്നാല് ഗര്ഭം അലസിയതോടെ, ”ഇനി നീ എന്ത് ചെയ്യും?” എന്ന് ചോദിച്ച് വിവാഹ വാഗ്ദാനത്തില് നിന്ന ഇയാള് വീണ്ടും പിന്മാറി. തുടര്ന്ന് യുവതി പത്തനംതിട്ട എസ്പിക്ക് പരാതി നല്കി. എന്നാല് റാന്നി പോലീസും സിപിഎം പ്രാദേശിക നേതൃത്വവും ചേര്ന്ന് പ്രതിക്ക് മുന്കൂര് ജാമ്യം ലഭിക്കാന് അവസരമൊരുക്കി എന്നാണ് അതിജീവിത പറയുന്നത്.
അലന് മാത്യുവുമായുള്ള വിവാഹം നടത്തി പ്രശ്നം പരിഹരിക്കാമെന്ന് സിപിഎം പ്രാദേശിക നേതൃത്വം തനിക്ക് വാക്കു നല്കുക മാത്രമല്ല, അതിന് സമൂഹത്തില് പ്രചാരം കൊടുക്കുകയും ചെയ്തതായി യുവതി പറയുന്നു. ഈ മാസം 23ന് വിവാഹം നടത്താമെന്നായിരുന്നു പാര്ട്ടിയുടെ വാക്ക്.
ഇതിനിടെ പ്രതി ഭീഷണി കടുപ്പിച്ചതോടെ 32 കാരിയായ യുവതി ആത്മഹത്യക്ക് ശ്രമിച്ചു. പോലീസ് കഴിഞ്ഞ 19ന് ആശുപത്രിയിലെത്തി യുവതിയുടെ മൊഴി രേഖപ്പെടുത്തി കേസ് എടുത്ത് അലനെതിരെ അന്വേഷണം ആരംഭിച്ചു. എന്നാല് പ്രതിക്ക് മുന്കൂര് ജാമ്യം ലഭിക്കുംവരെ അന്വേഷണം മന്ദഗതിയിലാക്കി. അലന് ഭീഷണിപ്പെടുത്തിയതും മര്ദ്ദിച്ചതും യുവതി പോലീസിനോട് പറഞ്ഞെങ്കിലും പ്രഥമ വിവര റിപ്പോര്ട്ടില് അതൊന്നും ഉള്പ്പെടുത്തിയില്ലെന്നും യുവതി പറയുന്നു.
മുമ്പ് ഡിവൈഎഫ്ഐ റാന്നി ഏരിയാ പ്രസിഡന്റായിരുന്നു അലന്. കഴിഞ്ഞ തദ്ദേശ സ്വയംഭരണ തെരഞ്ഞെടുപ്പില് പഴവങ്ങാടി പഞ്ചായത്ത് അഞ്ചാം വാര്ഡില് മത്സരിച്ചെങ്കിലും പരാജയപ്പെട്ടു. രണ്ട് മാസം മുമ്പ് ഇയാളെ പാര്ട്ടിയില് നിന്ന് പുറത്താക്കിയെന്നാണ് നേതൃത്വത്തിന്റെ വിശദീകരണം. എന്നാല് വിവാദത്തില് നിന്ന് ഒഴിഞ്ഞുമാറാനുള്ള പാര്ട്ടി നീക്കമാണ് ഇതിന് പിന്നിലെന്ന് അതിജീവിത പറയുന്നു.
