ന്യൂദല്‍ഹി: ശബരിമലയില്‍ പത്തു മുതല്‍ അമ്പതു വയസുവരെയുള്ള സ്ത്രീകള്‍ക്ക് ഏര്‍പ്പെടുത്തിയിരിക്കുന്ന വിലക്ക് തുടരണമെന്ന് തന്ത്രി കണ്ഠരര് രാജീവര്. സുപ്രീംകോടതിയിലാണ് തന്ത്രി നിലപാട് അറിയിച്ചത്.
ശബരിമലയിലെ ആചാരങ്ങള്‍ മാറ്റമില്ലാതെ തുടരണമെന്നാണ് ദേവപ്രശ്‌നത്തില്‍ തെളിഞ്ഞത്. ഇത് ദൈവിക ശക്തിയില്‍ നിന്നുള്ള ആധികാരിക നിര്‍ദേശമായി കണ്ട് അംഗീകരിക്കണമെന്ന് തന്ത്രി തന്റെ വാദത്തില്‍ പറയുന്നു.
പന്തളം കൊട്ടാരവും എന്‍എസ്എസും സമാന നിലപാടാണ് കോടതിയില്‍ സ്വീകരിച്ചിട്ടുളളത്. ദീര്‍ഘകാലമായുളള ആചാരങ്ങളില്‍ അവസാന തീര്‍പ്പ് കല്‍പ്പിക്കേണ്ടത് കോടതികളല്ലെന്ന് പന്തളം കൊട്ടാരം നിര്‍വാഹക സംഘം കോടതിയെ അറിയിച്ചു.
ആചാരങ്ങളില്‍ മാറ്റം വരുത്തുന്നതിന് മുന്‍പ് മതപണ്ഡിതന്മാരുമായും സാമൂഹിക പരിഷ്‌കര്‍ത്താക്കളുമായും വിശദമായ ചര്‍ച്ച വേണമെന്നാണ് സര്‍ക്കാരിന്റെ സത്യവാംഗ്മൂലത്തില്‍ പറയുന്നത്. സുപ്രീംകോടതിയുടെ ഒമ്പതംഗ ഭരണഘടനാ ബെഞ്ച് ഏപ്രില്‍ 7 മുതല്‍ കേസില്‍ വാദം കേള്‍ക്കും. കേസില്‍ വിവിധ കക്ഷികള്‍ക്ക് വാദങ്ങള്‍ സമര്‍പ്പിക്കാന്‍ മാര്‍ച്ച് 23 വരെ സമയം അനുവദിച്ചിട്ടുണ്ട്.
