മീനങ്ങാടി: സിപിഎം ഭരിക്കുന്ന സൊസൈറ്റിയിലെ ലക്ഷങ്ങളുടെ തട്ടിപ്പിന് ഇരയായ നിക്ഷേപകന് ദേഹത്ത് പെട്രോള് ഒഴിച്ച് തീ കൊളുത്തി ജീവനൊടുക്കാന് ശ്രമിച്ചു. പോലീസ് തന്ത്രത്തില് പെട്രോള് കന്നാസ് ബലമായി പിടിച്ചെടുത്തതിനാല് ദുരന്തം ഒഴിവായി. പാതിരിപ്പാലം ബ്രഹ്മഗിരി സൊസൈറ്റി ഓഫീസിന് മുന്നില് കല്പ്പറ്റ സ്വദേശി മാട്ടില് നൗഷാദാണ് ആത്മഹത്യാശ്രമം നടത്തിയത്.
16 ലക്ഷമാണ് ഇയാള് സൊസൈറ്റിയില് നിക്ഷേപിച്ചത്. പണമില്ലാത്തതിനാല് ജീവിതം ബുദ്ധിമുട്ടിലാണെന്നും നിരവധി തവണ ആവശ്യപ്പെട്ടിട്ടും നിക്ഷേപം തിരിച്ചുകിട്ടാത്തതിനെ തുടര്ന്നാണ് ആത്മഹത്യാശ്രമവുമായി എത്തിയതെന്നും നൗഷാദ് പറഞ്ഞു. മീനങ്ങാടി സ്റ്റേഷനിലെ എസ്ഐ മിഥുന് ദേവദാസിന്റെ നേതൃത്വത്തിലുള്ള പോലീസ് സംഘം ഏറെ നേരത്തെ സംസാരത്തിനൊടുവില് കന്നാസ് പി
ടിച്ചെടുത്തു.
രണ്ടുതവണയായി 16 ലക്ഷം രൂപയാണ് ബ്രഹ്മഗിരിയില് നിക്ഷേപിച്ചത്. ബ്രാഞ്ച് കമ്മിറ്റി അംഗമായിരുന്ന സമയത്ത് 14 ലക്ഷവും രണ്ട് ലക്ഷം രൂപ പിന്നീടും. രണ്ട് ലക്ഷം രൂപയുമായി ബന്ധപ്പെട്ട ചെക്ക് കേസില് താന് നിയമ പ്രശ്നങ്ങള് നേരിട്ടതായും, അതിന്റെ ഭാഗമായി ജയിലില് കഴിയേണ്ടി വന്നതായും നൗഷാദ് പറഞ്ഞു.
പാര്ട്ടി അനുഭാവികളാണ് വഞ്ചിക്കപ്പെട്ടവരേറെയും. നീതി ലഭ്യമാക്കണമെന്ന് ആവശ്യപ്പെട്ട് മുഖ്യമന്ത്രിയടക്കം പരാതി നല്കിയിട്ടും യാതൊരു പരിഹാരവും ഉണ്ടായിട്ടില്ല. ജീവിക്കാന് വഴിയില്ലാത്ത സാഹചര്യത്തിലാണ് ഇത്തരമൊരു തീരുമാനത്തിലേക്ക് നീങ്ങിയത്.
ഇത്തരത്തില് നൂറ് കണക്കിന് സാധാരണക്കാരില് നിന്നായി ബ്രഹ്മഗിരി സൊസൈറ്റിയുടെ പേരില് കോടികളാണ് സിപിഎം നേതാക്കാള് തട്ടിയെടുത്തത്. നിക്ഷേപകര് പല തവണ സമരവുമായി എത്തിയിട്ടും പണം തിരികെ നല്കാന് ഇവര് കൂട്ടാക്കിയിട്ടില്ല.
