തിരുവനന്തപുരം: ആറ്റുകാല് പൊങ്കാലക്കായി ദശലക്ഷക്കണക്കിന് ഭക്തര് തലസ്ഥാനത്ത് എത്തുമ്പോള് നഗരത്തിന്റെ പല ഭാഗത്തും കുടിവെള്ളം മുട്ടിച്ച സംഭവത്തില് ശക്തമായി പ്രതിഷേധിക്കുന്നതായി കേരള ക്ഷേത്ര സംരക്ഷണ സമിതി സംസ്ഥാന ഉപാദ്ധ്യക്ഷന് ജി.കെ. സുരേഷ് ബാബു, ജനറല് സെക്രട്ടറി കെ.എസ്. നാരായണന് എന്നിവര് അറിയിച്ചു.
പൊങ്കാല സമയത്ത് പൈപ്പ് പണിയുടെ പേരില് കുടിവെള്ളം മുട്ടിക്കുന്നതിനു പിന്നില് ആസൂത്രിത ഗുഢാലോചനയുണ്ട്. വര്ഷങ്ങള്ക്കു മുമ്പും പൈപ്പ് പൊട്ടിച്ച സംഭവങ്ങള് ഉണ്ടായിട്ടുണ്ട്. കോര്പ്പറേഷന് ഭരണം ബിജെപി നേടിയ ശേഷമുള്ള രാഷ്ട്രീയ പക വീട്ടലാണിത്. സംഭവത്തെ ക്ഷേത്ര സംരക്ഷണ സമിതി വളരെ ഗൗരവമായി കാണുന്നു. ഇക്കാര്യത്തില് ജലവിഭവ മന്ത്രി സ്വതന്ത്ര ഉന്നതതല അന്വേഷണത്തിന് ഉത്തരവിടണമെന്നും ആവശ്യപ്പെട്ടു.
