തൃശൂര്: മദമിളകിയ ആനകളെയും അപകടം വിതയ്ക്കുന്ന വന്യമൃഗങ്ങളെയും മയക്കുന്നതിനായി വിദൂര നിയന്ത്രിത ഡ്രോണ് അധിഷ്ഠിത മയക്കുവെടി സംവിധാനം ഉപരാഷ്ട്രപതി സി.പി. രാധാകൃഷ്ണന് തൃശൂരില് പുറത്തിറക്കി. ദേവമാതാ സ്കൂള് അങ്കണത്തില് നടന്ന ചടങ്ങില് വച്ചാണ് മയക്കുവെടി വിദഗ്ധന് ഡോ. പി.ബി. ഗിരിദാസ് രൂപകല്പ്പന ചെയ്ത പുതിയ സംവിധാനം അവതരിപ്പിച്ചത്.
കേന്ദ്ര മന്ത്രി സുരേഷ് ഗോപി അധ്യക്ഷനായുള്ള ലക്ഷ്മി ചാരിറ്റബിള് ട്രസ്റ്റ് ആണ് ഗജാസ്ത്രം എന്ന പദ്ധതിക്ക് ധനസഹായം നല്കുന്നത്.
റിമോട്ടില് പ്രവര്ത്തിക്കുന്ന ഡ്രോണില് മയക്കുവെടിക്കുള്ള ക്യാപ്ചര് ഗണ്ണും സിറിഞ്ചും മരുന്നുമടക്കമുള്ള സംവിധാനങ്ങള് ഒരുക്കിയാണ് ഉപകരണം പ്രവര്ത്തിക്കുക. 500 മീറ്റര് അകലത്ത് നിന്ന് പോലും ഉപകരണം പ്രവര്ത്തിപ്പിക്കാവുന്നതുകൊണ്ട് പ്രവര്ത്തനത്തില് ഏര്പ്പെടുന്ന വിദഗ്ധര്ക്കും സഹായികള്ക്കും പൊതുജനങ്ങള്ക്കും പൂര്ണ സുരക്ഷ നല്കുന്നു എന്നതാണ് പദ്ധതിയുടെ മെച്ചം. കൂടാതെ മൊബൈലുമായി ബന്ധിപ്പിച്ചിട്ടുള്ള ജിപിഎസ് സിസ്റ്റവും ക്യാമറയും മുഖാന്തരം കൃത്യത ഉറപ്പാക്കുവാനും സാധിക്കും. വന്യമൃഗങ്ങളെയും ആനകളെയും നിയന്ത്രിക്കുവാന് ബുദ്ധിമുട്ടുള്ള വനപ്രദേശങ്ങളിലും ഭൂമിശാസ്ത്രപരമായ പ്രത്യേകതയുള്ള സ്ഥലങ്ങളിലും ഈ സംവിധാനം ഫലപ്രദമായി ഉപയോഗിക്കുവാന് സാധിക്കും. കേന്ദ്ര നാട്ടാന പരിപാലന സംരക്ഷണ സമിതിയുടെ അംഗവും എലിഫന്റ് ഡാര്ട്ടിങ് എക്സ്പെര്ട്ടുമായ ഡോ. പി.ബി. ഗിരിദാസ് 30 വര്ഷമായി മയക്കുവെടി പ്രവര്ത്തനങ്ങളില് സജീവമാണ്.
ഗജാസ്ത്രം പദ്ധതിയുടെ ഭാഗമായി ഡ്രോണ് പൈലറ്റ് ലൈസന്സ് നടപടികളും അദ്ദേഹം പൂര്ത്തിയാക്കിയിട്ടുണ്ട്. മുന് തൃശൂര് ജില്ലാമൃഗസംരക്ഷണ ഓഫീസര് ഡോ. അജിത് ബാബു, അസി. ഡയറക്ടര് ഡോ. മനോജ് മാത്യു, എസ്പിസിഎ ഇന്സ്പെക്ടര് അനില്. ഇ., സാങ്കേതിക സഹായം നല്കുന്ന വിനോദ് കുമാര് സി. ജി. എന്നിവര് ഗജാസ്ത്രം സംഘത്തില് അംഗങ്ങളാണ്. വനം വകുപ്പിലെ വിദഗ്ധര്ക്കും സര്ക്കാര് എലിഫന്റ് സ്ക്വാഡിലെ ഉദ്യോഗസ്ഥര്ക്കും ഈ സംവിധാനം ഉപകാരപ്രദമാകും എന്ന് ലക്ഷ്മി ചാരിറ്റബിള് ട്രസ്റ്റ് പദ്ധതിയുടെ അധ്യക്ഷനും കേന്ദ്രമന്ത്രിയുമായ സുരേഷ് ഗോപി അഭിപ്രായപ്പെട്ടു.
