ഇസ്ലാമബാദ്: ഇറാന്റെ പരമോന്നത നേതാവ് ആയത്തൊള്ള ഖമേനിയെ അമേരിക്കയും ഇസ്രയേലും ചേര്‍ന്ന് വധിച്ചുവെന്ന വാര്‍ത്ത കേട്ട് യുഎസ് എംബസി തല്ലിത്തകര്‍ക്കുകയും തീയിടാന്‍ ശ്രമിയ്‌ക്കുകയും ചെയ്ത് പാകിസ്ഥാന്‍കാര്‍. അമേരിക്കന്‍ പ്രസിഡന്റ് ഡൊണള്‍ഡ് ട്രംപിനൊപ്പം നിന്ന് ഫോട്ടോകള്‍ എടുത്ത് അമേരിക്ക തങ്ങള്‍ക്കൊപ്പമാണെന്ന് സ്ഥാപിക്കാന്‍ ശ്രമിക്കുന്ന പാക് സൈനികമേധാവി അസിം മുനീറിനും പാകിസ്ഥാന്‍ പ്രധാനമന്ത്രി ഷെഹ്ബാസ് ഷെരീഫിനും നാണക്കേടായിരിക്കുകയാണ് ഈ സംഭവം.
ഞായറാഴ്ച ഇറാന്‍ ആത്മീയനേതാവ് ആയത്തൊള്ള ഖമേനിയുടെ മരണവാര്‍ത്ത അറിഞ്ഞയുടനെയാണ് രോഷാകുലരായ നൂറുകണക്കിന് പാകിസ്ഥാന്‍കാര്‍ പാകിസ്ഥാനിലെ കറാച്ചിയിലുള്ള അമേരിക്കയുടെ എംബസി ഓഫീസ് തല്ലിത്തകര്‍ത്ത് അതിന് തീയിടാന്‍ ശ്രമിച്ചത്.
ഗത്യന്തരമില്ലെന്ന് വന്നപ്പോള്‍ പാകിസ്ഥാന്‍ സുരക്ഷാസേന സ്ഥലത്തെത്തി. കണ്ണീര്‍വാതകഷെല്ലുകള്‍ പൊട്ടിച്ചിട്ടും ഇവര്‍ പിരിഞ്ഞുപോകാന്‍ തയ്യാറായില്ല. ഒടുവില്‍ ഇവരെ പിരിച്ചുവിടാന്‍ വെടിയുതിര്‍ക്കേണ്ടിവന്നു. പത്ത് പേര്‍ കൊല്ലപ്പെട്ടതായും നിരവധി പേര്‍ക്ക് പരിക്കേറ്റതായും ആണ് റിപ്പോര്‍ട്ട്. കറാച്ചിയിലെ സിവില്‍ ആശുപത്രിയില്‍ പത്തോളം മൃതദേഹങ്ങള്‍ കൊണ്ടുവന്നതായി ഡോ. സുമയ്യ സയ്യിദ് പറഞ്ഞു.
.അമേരിക്കയുടെ പ്രീതി പിടിച്ചുപറ്റാന്‍ മത്സരിക്കുന്ന പാകിസ്ഥാന്‍ പ്രധാനമന്ത്രി ഷെഹ്ബാസ് ഷെരീഫിനും സൈനിക മേധാവി അസിം മുനീറിനും വലിയ നാണക്കേടായിരിക്കുകയാണ് ഈ സംഭവം. കാരണം ട്രംപ് തങ്ങള്‍ക്കൊപ്പമാണെന്ന് കാണിക്കാന്‍ മത്സരിക്കുന്നവരാണ് ഇരുവരും. പാകിസ്ഥാനില്‍ ക്രിപ്റ്റോകറന്‍സിയ്‌ക്ക് അനുമതി നല്‍കിയതും ഇലോണ്‍മസ്കിന്റെ സ്റ്റാര്‍ലിങ്ക് എന്ന ഉപഗ്രഹ ഇന്‍റര്‍നെറ്റ് ആരംഭിയ്‌ക്കാന്‍ പാകിസ്ഥാനില്‍ ലൈസന്‍സ് അനുവദിച്ചതും ട്രംപിനെ ,സന്തോഷിപ്പിക്കാനായിരുന്നു. പക്ഷെ അമേരിക്കന്‍ എംബസി തീയിട്ടത് അമേരിക്കയെയും ട്രംപിനെയും രോഷാകുലരാക്കിയിട്ടുണ്ട്. ഇനി എങ്ങിനെ ട്രംപിന്റെ മുഖത്ത് നോക്കും എന്ന ജാള്യതയിലാണ് ഇപ്പോള്‍ ഷെഹ്ബാസ് ഷെരീഫും അസിംമുനീറും.
