ചെന്നൈ: പ്രധാനമന്ത്രി നരേന്ദ്ര മോദിയുടെ മധുര സന്ദര്ശനം തമിഴ്നാട്ടിലെ ഭരണകക്ഷിയായ ദ്രാവിഡ മുന്നേറ്റ കഴകത്തിന്റെ (ഡിഎംകെ) ഭരണത്തിന് അന്ത്യം കുറിക്കാനുള്ള നിര്ണായക നീക്കമായിരിക്കുമെന്ന് തമിഴ്നാട് ബിജെപി വക്താവ് എ.എന്.എസ്. പ്രസാദ് പറഞ്ഞു. നാളെയാണ് മോദിയുടെ മധുര സന്ദര്ശനം.
ഡിഎംകെ ഭരണകൂടം അഴിമതിയില് മുങ്ങിയിരിക്കുകയാണ്. അഴിമതിക്കാരായ മന്ത്രിമാരുടെയും ഉദ്യോഗസ്ഥരുടെയും വെറും ഉപകരണം മാത്രമായി സര്ക്കാര് മാറി. ഇത് തമിഴ്നാടിനെ 10.50 ലക്ഷം കോടി രൂപയുടെ കടക്കെണിയിലേക്ക് തള്ളിവിട്ടു. ക്രമസമാധാന നില താറുമാറാക്കിയ മുഖ്യമന്ത്രി എം.കെ. സ്റ്റാലിന് സംസ്ഥാനത്തെ ഭീകര ശക്തികളുടെ താവളമാക്കി മാറ്റിയതായും എ.എന്.എസ്. പ്രസാദ് ആരോപിച്ചു.
‘പ്രധാനമന്ത്രി മോദിയുടെ മധുരയിലേക്കുള്ള വരവ് അഴിമതി നിറഞ്ഞ ഡിഎംകെയുടെ ഭരണം അവസാനിപ്പിക്കും. തമിഴ്നാടിനെ കടക്കെണിയിലാക്കിയ, ക്രമസമാധാനം തകര്ത്ത സ്റ്റാലിനെ വരാനിരിക്കുന്ന നിയമസഭാ തെരഞ്ഞെടുപ്പില് തമിഴ്നാട്ടിലെ ജനങ്ങള് തള്ളിക്കളയുമെന്നും പകരം എഐഎഡിഎംകെ- ബിജെപി നേതൃത്വത്തിലുള്ള ദേശീയ ജനാധിപത്യ സഖ്യത്തിന് വോട്ട് ചെയ്യുമെന്നും അദ്ദേഹം ആത്മവിശ്വാസം പ്രകടിപ്പിച്ചു.
ഹിന്ദു മത- ധര്മസ്ഥാപന വകുപ്പിന് കീഴിലുള്ള ക്ഷേത്രങ്ങളില് നിന്ന് 1,000 കോടിയിലധികം രൂപ ഡിഎംകെ സര്ക്കാര് ആസൂത്രിതമായി തട്ടിയെടുത്തതായും അദ്ദേഹം ആരോപി
ച്ചു. ‘കഴിഞ്ഞ അഞ്ച് വര്ഷമായി, ഈ സര്ക്കാര് ക്ഷേത്രങ്ങളിലെ പവിത്രമായ കുംഭാഭിഷേക ചടങ്ങുകളില് പോലും അഴിമതി നടത്തി. ഭക്തരുടെ സംഭാവനകള് ഉപയോഗിച്ച് 4,332 ക്ഷേത്രങ്ങളില് കുംഭാഭിഷേകം നടത്തിയിട്ടും, ലജ്ജയില്ലാതെ ഈ സര്ക്കാര് അതില് അഴിമതി നടത്തുകയും അതിന്റെ ക്രെഡിറ്റ് എടുക്കാനും ശ്രമിക്കുന്നു. ഇ.വി. രാമസ്വാമി നായ്ക്കര് (പെരിയാര്) ദൈവങ്ങള്ക്കെതിരെ സംസാരിച്ചിട്ടുണ്ടാകാം, എന്നാല് സ്റ്റാലിനും മന്ത്രി ശേഖര് ബാബുവും ദൈവത്തെ പോലും വഞ്ചിക്കുകയാണ് ചെയ്തത്. അവര് വൈകാതെ തന്നെ ദൈവത്തിന്റെ ശിക്ഷ ഏറ്റുവാങ്ങും, ‘അദ്ദേഹം പറഞ്ഞു.
മധുരയിലെ തിരുപ്രംകുണ്ഡ്രം ക്ഷേത്രത്തില് കാര്ത്തിക ദീപം തെളിയിക്കുന്നതിന് തടസം നില്ക്കുന്ന ഡിഎംകെയുടെ നടപടിയെ അദ്ദേഹം രൂക്ഷമായി വിമര്ശിച്ചു. തമിഴ്നാട് ഭരിക്കാനുള്ള ധാര്മിക അവകാശം അവര്ക്ക് നഷ്ടമായി. ടാസ്മാക് മദ്യവില്പനയിലൂടെ സ്ത്രീകളുടെ ജീവിതം നശിപ്പിക്കുന്ന ഡിഎംകെയ്ക്ക് സ്ത്രീകള് വോട്ട് ചെയ്യില്ലെന്നും പ്രസാദ് പറഞ്ഞു. കഴിഞ്ഞ അഞ്ച് വര്ഷമായി വാഗ്ദാനം ചെയ്ത പൊങ്കല് സമ്മാനങ്ങള് നല്കാതെ ജനങ്ങളെ വഞ്ചിച്ചുവെന്നും ബിജെപിയുടെ സമ്മര്ദ്ദത്തിന് പിന്നാലെയാണ് ഇപ്പോള് തുക നല്കാന് തയ്യാറായതെന്നും അദ്ദേഹം ആരോപിച്ചു.
പ്രധാനമന്ത്രി മോദിയുടെയും എടപ്പാടി പളനിസ്വാമിയുടെയും ‘ഡബിള് എന്ജിന്’ ഭരണം തമിഴ്നാടിനെ ഡിഎംകെയില് നിന്ന് മോചിപ്പിക്കും, സംസ്ഥാനത്തെ യഥാര്ത്ഥ പുരോഗതിയിലേക്ക് നയിക്കും. സൗജന്യങ്ങള് നല്കി അധികാരം പിടിക്കാമെന്ന ഡിഎംകെയുടെ മോഹം ഇത്തവണ നടക്കില്ലെന്നും അദ്ദേഹം കൂട്ടിച്ചേര്ത്തു.
