തിരുവനന്തപുരം:സര്‍ക്കാര്‍ ജീവനക്കാരുടെ ഫോണില്‍ മുഖ്യമന്ത്രിയുടെ സന്ദേശമെത്തിയതുമായി ബന്ധപ്പെട്ട ഡാറ്റ ചോര്‍ത്തല്‍ വിവാദത്തില്‍ കൂടുതല്‍ വ്യക്തത വന്നു.മുഖ്യമന്ത്രിയുടെ ഓഫീസിലെ ഓഫീസര്‍ ഓണ്‍ സ്‌പെഷ്യല്‍ ഡ്യൂട്ടി ശ്രീറാം സാംബശിവ റാവു കെ-സ്മാര്‍ട്ടിലുള്ളവരുടെ വിവരങ്ങള്‍ തേടി ഇന്‍ഫര്‍മേഷന്‍ കേരള മിഷന്‍ ചീഫ് ഡയറക്ടര്‍ക്ക് അയച്ച കത്ത് പുറത്തു വന്നു.കെ-സ്മാര്‍ട്ടില്‍ രജിസ്റ്റര്‍ ചെയ്തവരുടെ പേര്, വയസ്, വാര്‍ഡ്, ഫോണ്‍ നമ്പര്‍ അടക്കം വിവരങ്ങള്‍ തേടിയാണ് കത്ത് അയച്ചത്. കെ-സ്മാര്‍ട്ടിന് കീഴിലെ 936 സേവനങ്ങളിലായി രജിസ്റ്റര്‍ ചെയ്തവരുടെ വിവരങ്ങളാണ് തേടിയത്. ഐടി വകുപ്പിനും ഇന്‍ഫര്‍മേഷന്‍ കേരള മിഷനുമാണ് സര്‍ക്കാരിന്റെ ഐടി സേവനങ്ങളുടെ മേല്‍നോട്ടമുള്ളത്.
നേരത്തെ സര്‍ക്കാര്‍ ഉദ്യോഗസ്ഥരുടെ വിവരങ്ങളുള്ള സ്പാര്‍ക് സോഫ്റ്റ്വെയറില്‍ നിന്നാണ് ഡാറ്റ ചോര്‍ത്തിയതെന്നായിരുന്നു വിവരം.എന്നാല്‍ ഇതിനേക്കാള്‍ വളരെയേറെ വ്യാപ്തിയുള്ള അതീവ ഗുരുതര ഡാറ്റ ചോര്‍ത്തലാണ് നടന്നതെന്നാണ് അറിയുന്നത്.
കെ-സ്മാര്‍ട്ടിലെ വിവിധ സേവനങ്ങളിലായി രജിസ്റ്റര്‍ ചെയ്ത ഒരു കോടിയോളം പേരുടെ വിവരങ്ങളാണ് ഇന്‍ഫര്‍മേഷന്‍ കേരള മിഷന്റെ പക്കലുള്ളത്.ഈ വിവരങ്ങള്‍ എടുത്ത് മുഖ്യമന്ത്രിയുടെ ഓഫീസില്‍ നിന്ന് സന്ദേശങ്ങള്‍ അയച്ചെന്നാണ് പുറത്തുവരുന്ന വിവരങ്ങള്‍.
മുഖ്യമന്ത്രിയുടെ ഓഫീസ് കേന്ദ്രീകരിച്ചാണ് ഈ ഡാറ്റ ചോര്‍ത്തല്‍ നടന്നതെന്നാണ് ആരോപണം.
