കോഴിക്കോട്: എഴുത്തുകാരന്‍ വി ആര്‍ സുധീഷ് നല്കിയ മാനനഷ്ട കേസില്‍ കോണ്ഗ്രസിന്റെ സാംസ്‌കാരിക സംഘടന സംസ്‌കാര സാഹിതി ജനറല്‍ സെക്രട്ടറി എംഎ ഷഹനാസ് കീഴടങ്ങി. കോഴിക്കോട് ഫസ്റ്റ് ക്ലാസ് ജുഡീഷ്യല്‍ മജീസ്‌ട്രേറ്റ് കോടതി മുമ്പാകെയാണ് കീഴടങ്ങിയത്. അറസ്റ്റ് വാറണ്ട് പുറപ്പെടുവിച്ചതിനെ തുടര്‍ന്നാണ് കീഴടങ്ങിയത്.
കഴിഞ്ഞ വര്‍ഷം ജൂണ്‍ മാസത്തില്‍ ഷഹനാസിന് ജാമ്യത്തോട് കൂടിയ വാറണ്ട് കോടതി പുറപ്പെടുവിച്ചിരുന്നു.എന്നാല്‍ ഷഹനാസ് കോടതിയില്‍ ഹാജരായില്ല.തുടര്‍ന്ന് ഡിസംബറിലും കോടതിയില്‍ ഹാജരാകാന്‍ നിര്‍ദേശം നല്‍കി.അപ്പോഴും ഷഹനാസ് കോടതില്‍ ഹാജരാകാത്ത പശ്ചാത്തലത്തിലാണ് ജാമ്യമില്ലാ വാറണ്ട് പുറപ്പെടുവിച്ചത്.
സുധീഷിന്റെ പരാതിയില്‍ ഷഹനാസിനെതിരെ നടപടിയെടുക്കാത്ത സി.ഐ യ്‌ക്ക് കോഴിക്കോട് ജുഡീഷ്യല്‍ ഫസ്റ്റ് ക്ലാസ് കോടതി മെമ്മോ അയച്ചിരുന്നു.പൊലീസിന്റെ കണ്മുന്നില്‍ ഉണ്ടായിട്ടും ഷഹനാസിനെ അറസ്റ്റ് ചെയ്തിരുന്നില്ല.2023ലാണ് കേസിന് ആധാരമായ സംഭവം.
കേസുമായി മുന്നോട്ട് പോകാനാണ് തീരുമാനമെന്ന് വി ആര്‍ സുധീഷ് നേരത്തേ പറഞ്ഞിരുന്നു.സമൂഹമാധ്യമങ്ങള്‍ വഴി ഷഹനാസ് സുധീറിനെ അപകീര്‍ത്തിപ്പെടുത്തിയെന്നാണ് കേസ്. തന്റെ വ്യക്തി-സാമൂഹിക ജീവിതത്തിന് ദോഷകരമാകുംവിധമാണ് യുവതി പരാമര്‍ശം നടത്തിയതെന്നും ഇത് പിന്‍വലിച്ച് മാധ്യമങ്ങളിലൂടെ മാപ്പ് പറയണമെന്നും സുധീര്‍ ആവശ്യപ്പെട്ടിരുന്നു. നഷ്ടപരിഹാരമായി 25 ലക്ഷം രൂപ നല്‍കണമെന്ന് ആവശ്യപ്പെട്ട് സുധീഷ് ഷഹനാസിന് വക്കീല്‍ നോട്ടീസും അയച്ചിരുന്നു.
