കൊച്ചി: കോൺഫിഡന്റ് ഗ്രൂപ്പ് ചെയർമാൻ ഡോ. സി.ജെ. റോയിയുടെ ആത്മഹത്യാവാര്‍ത്തയില്‍ ഉറക്കം നഷ്ടപ്പെട്ട് ഒരു നടി. റോയി തന്നെ നിര്‍മ്മിച്ച കാസനോവ ഉള്‍പ്പെടെയുള്ള സിനിമകളില്‍ അഭിനയിച്ച ഡിംപിള്‍ റോസ് എന്ന നടിയാണ് തന്റെ അനുഭവം ഈയിടെ തുറന്നു പറഞ്ഞത്.
”റോയ് സാറിന്റെ കോൺഫിഡന്റ് ഗ്രൂപ്പ് കുടുംബത്തിലെ അംഗമാണ് ഞാന‍ും. എന്റെ കരിയറിൽ ഹൈപ്പ് തന്ന കാസിനോവ സിനിമയുടെ നിർമാതാവും അദ്ദേഹമായിരുന്നു. ആ സിനിമ വഴി റോയ് സാറിനെ എനിക്ക് വ്യക്തിപരമായി പരിചയമുണ്ട്. അദ്ദേഹത്തെ നേരിട്ട് കണ്ട് സംസാരിക്കുകയും വീട്ടിൽ പോയി കാണുകയും ചെയ്തിട്ടുണ്ട്. ഡൗൺ ടു എർത്തായിട്ടുള്ള ആളാണ്. അടുത്തിടെ ഞാന്‍ എടുത്തത് കോണ്‍ഫിഡന്‍റിന്റെ ഫ്ലാറ്റാണ്. അദ്ദേഹത്തിന്റെ മരണം ആത്മഹത്യയായിരുന്നുവെന്നത് ഏറെ വേദനിപ്പിച്ചു”.- ഡിംപിള്‍ റോസ് പറയുന്നു.
” ഞാന്‍ കഷ്ടപ്പെട്ട് സമ്പാദിച്ച പണം കോൺഫിഡന്റ് പ്രോപ്പർട്ടിയിൽ നിക്ഷേപിച്ചിട്ടുണ്ട്. അതിന്റെ ഭാവി എന്താകുമെന്ന ഭയം ഉണ്ടായി‌രുന്നു. എനിക്ക് ഉറക്കമുണ്ടായിരുന്നില്ല. ഞങ്ങളുടെ സ്വപ്ന ഭവനത്തിന്റെ കാര്യം കോൺഫിഡന്റ് ഗ്രൂപ്പ് വഴിയാണ് പുരോഗമിക്കുന്നത്. ഇതെല്ലാം കൂടി മനസിൽ കിടന്നാണ് എന്റെ ഉറക്കം പോയത്. കോൺഫിഡന്റ് ഗ്രൂപ്പിലെ ഉദ്യോഗസ്ഥരുമായി ഞാൻ സംസാരിച്ചു, മെയിൽ കൃത്യമായി വരുന്നുണ്ട്, സൈറ്റിൽ പോയിരുന്നു. വർക്ക് കൃത്യമായി നടക്കുന്നുണ്ട്’- ഡിംപിൾ വീഡിയോയിൽ പറയുന്നു.
നിരവധി പേര്‍ റോയി സാറിനെ വിശ്വസിച്ച് പണം നല‍്കിയിട്ടുണ്ടെന്ന് പറയപ്പെടുന്നു. പക്ഷെ ആരും ഇതുവരെ പരാതിയുമായി പുറത്തുവന്നിട്ടില്ല. ഈ നിക്ഷേപകരുടെ ആശങ്കയകറ്റാന്‍ കോണ്ഫിഡന്റ് ഗ്രൂപ്പിന്റെ എംഡി ടി.എ. ജോസഫ് നടത്തിയ പ്രസ്താവന ശ്രദ്ധേയമാവുകയാണ്. നേരത്തെ കേന്ദ്ര അന്വേഷണ ഏജന്‍സികള്‍ റോയിയെ പീഢിപ്പിച്ചിരുന്നു എന്ന് പരാതിപ്പെട്ടിരുന്ന ടി.എ. ജോസഫ് ഇപ്പോള്‍ പറയുന്നത് കോണ്ഫിഡന്റ് ഗ്രൂപ്പിന് പിന്നാലെ ഇഡിയോ സിബിഐയോ ഒന്നും ഇല്ലെന്നാണ്.
ബാങ്കില്‍ നിന്നും ഒരു രൂപ കടമെടുക്കാതെ സീറോ ഡെബ്റ്റില്‍ ആണ് തന്റെ റിയല്‍ എസ്റ്റേറ്റ് ബിസിനസ് മുന്നേറുന്നത് എന്ന് റോയി പലപ്പോഴും അവകാശപ്പെട്ടിരുന്നു. പക്ഷെ റോയി ആത്മഹത്യ ചെയ്ത ശേഷമാണ് രാഷ്‌ട്രീയക്കാരുടെയും സിനിമക്കാരുടെയും പണം റോയിയുടെ കയ്യിലുണ്ടെന്ന് പരാതി ഉയരുന്നത്. പ്രമുഖ താരങ്ങളുടേതുള്‍പ്പെടെ പണം റോയി വാങ്ങിയതായും സംശയം ഉയരുന്നുണ്ട്. സ്ലൊവാക് റിപ്പബ്ലിക് എന്ന രാജ്യത്തിന്റെ കോണ്‍സല്‍ ജനറല്‍ പദവി കോടികള്‍ നല്‍കി വാങ്ങിയ റോയിയ്‌ക്ക് ചില സംശയകരമായ സാമ്പത്തിക ഇടപാടുകള്‍ നടത്തിയതായും ആരോപണം ഉയരുന്നു.
