അഭിനയ രംഗത്തേക്ക് കുറച്ച് വെെകിയെത്തിയ നടിയാണ് ആശ ശരത്ത്. പണ്ട് കമലദളം എന്ന സിനിമയിൽ നായികയായി അവസരം ലഭിച്ചിട്ടും ചെയ്യാൻ കഴിയായിരുന്നതിന്റെ വിഷമം ആശ ശരത്തിനുണ്ടായിരുന്നു. എന്നാൽ ഇന്ന് ശ്രദ്ധേയ വേഷങ്ങൾ ആശ ശരത്തിന് ലഭിക്കുന്നുണ്ട്. തനിക്ക് ചെയ്യാൻ പറ്റാതെ പോയ മറ്റൊരു സിനിമയെക്കുറിച്ച് സംസാരിക്കുകയാണിപ്പോൾ ആശ ശരത്ത്.
അവസാനം എന്റെ കെെവിട്ട് പോയ സിനിമയാണ് തുടരും. ബെൻസ് വാസു എന്ന സിനിമയായിരുന്നു ആദ്യം അത്. സിദ്ദിഖ് ലാലിലെ ലാലു ചേട്ടനായിരുന്നു അന്ന് അതിലെ നായകൻ. ഞാനായിരുന്നു നായികാ വേഷം. പക്ഷെ തുടരുമിലേക്ക് എത്തിയപ്പോഴേക്കും വ്യത്യാസങ്ങൾ വന്നിട്ടുണ്ട്. ഷൂട്ട് തുടങ്ങുന്നതിന് തൊട്ട് മുമ്പ് ഷൂട്ട് നിന്ന് പോയി. നടന്നില്ല. അന്നത്തെ സംവിധായകന് കുറച്ച് ആരോഗ്യപ്രശ്നങ്ങൾ വന്നത് കാരണം ആ പ്രൊജക്ട് നടന്നില്ല. പിന്നെ അത് മറ്റൊരു സംവിധായകനിലേക്ക് പോയി. ആ സമയത്തും എന്നെയായിരുന്നു പരിഗണിച്ചത്. പിന്നെ കുറേ വർഷങ്ങൾ ഒരു അനക്കവും ഇല്ല. പിന്നെ വർഷങ്ങൾക്ക് ശേഷമാണ് തുടരും എന്ന സിനിമ വരുന്നത്. തുടരും മികച്ച സിനിമയാണെന്നും ആശ ശരത്ത് പറഞ്ഞു.
ശോഭനയാണ് തുടരുമിൽ നായികാ വേഷം ചെയ്തത്. ശോഭനയ്ക്ക് മുമ്പ് തുടരും സിനിമയിലേക്ക് മറ്റ് നടിമാരെ പരിഗണിച്ചിരുന്നു. ആദ്യം ജ്യോതികയെയാണ് പരിഗണിച്ചത്. കഥ ജ്യോതികയ്ക്ക് ഇഷ്ടമായതാണ്. ജ്യോതികയുടെ ഡേറ്റ് ഇഷ്യൂ കാരണം ഈ കാസ്റ്റിംഗ് നടന്നില്ല. നർത്തകി മേതിൽ ദേവികയെയും ഈ റോളിലേക്ക് പരിഗണിച്ചിരുന്നു. പക്ഷെ മേതിൽ ദേവിക സിനിമ നിരസിച്ചു.
