തിരുനാവായ: മഹാമാഘ മഹോത്സവത്തിന്റെ തുടക്കം മുതല്‍ ഭക്തരുടെ ഒഴുക്കില്‍ വിശപ്പും ദാഹവും സഹിച്ച് ഒരുകൂട്ടം സന്നദ്ധ പ്രവര്‍ത്തകര്‍ കഠിനപ്രയത്നത്തിലായിരുന്നു. കര്‍ത്തവ്യത്തില്‍ നിന്ന് വ്യതിചലിക്കാതെ അവര്‍ കര്‍മനിരതരായിരുന്നു. പത്തൊന്‍പതു ദിവസമായി തിരുനാവായ മണല്‍പ്പരപ്പില്‍ അവരുണ്ടായിരുന്നു.
മഹാമാഘ മഹോത്സവം സമാപിച്ച ശേഷവും അവരുടെ ദൗത്യം അവസാനിച്ചിരുന്നില്ല. നിളാ നദിക്കരയെ പഴയപടിയാക്കി അവസാന മാലിന്യവും നീക്കിയ ശേഷമാണ് മാനവ സേവ മാധവ സേവയാണെന്ന വ്രതം ഏറ്റെടുത്ത ദേശീയ സേവാഭാരതി പ്രവര്‍ത്തകര്‍ ഭാരതപ്പുഴയുടെ തീരം വിട്ടത്. തിരുനാവായ നാവാമുകുന്ദ ക്ഷേത്ര പരിസരം, യജ്ഞ വേദി മണല്‍പ്പുറം, തവനൂര്‍ ബ്രഹ്മ ശിവക്ഷേത്ര പരിസരം എന്നിവിടങ്ങള്‍ ശുചീകരിച്ചു. ഇന്നലെ സേവാഭാരതി പ്രവര്‍ത്തകര്‍ രാവിലെ 7.30 മുതല്‍ ശുചീകരണം ആരംഭിച്ചു.
ആര്‍എസ്എസ് മുതിര്‍ന്ന പ്രചാരകന്‍ എസ്. സേതുമാധവന്‍, ഉത്തര കേരളം പ്രാന്ത പ്രചാരക് അ. വിനോദ്, പ്രാന്ത സേവാ പ്രമുഖ് എം.സി. വത്സന്‍, സഹ സേവാപ്രമുഖ് കെ. ദാമോദരന്‍ തുടങ്ങിയവര്‍ നേതൃത്വം നല്കി. ഇരുപതു ദിവസവും കര്‍മനിരതരായിരുന്ന സേവാ ഭാരതി പ്രവര്‍ത്തകരെ മഹാമാഘ സഭ സഭാപതി മഹാമണ്ഡലേശ്വര്‍ സ്വാമി ആനന്ദവനം ഭാരതി അഭിസംബോധന ചെയ്തു. പ്രസാദവും നല്കി.
ശബരിമല മുന്‍ മേല്‍ശാന്തി സുധീര്‍ നമ്പൂതിരി, ഭാരതീയ ധര്‍മ പ്രചാര്‍ സഭ ആചാര്യന്‍ ശ്രീനാഥ് കാരയാട്ട്, സ്വാമിനി അവന്തിക ഭാരതി, തുടങ്ങിയവര്‍ സേവാഭാരതി പ്രവര്‍ത്തകര്‍ക്കൊപ്പമുണ്ടായിരുന്നു. തുടര്‍ന്ന് മഹാമണ്ഡലേശ്വറിന്റെ നേതൃത്വത്തില്‍ സേവാഭാരതി പ്രവര്‍ത്തകര്‍ നിളാ സ്നാനം നടത്തി.
ജന്മഭൂമി ഓണ്‍ലൈന്‍