തിരുവനന്തപുരം: കാശ്മീരിനെ വിവാദ സംസ്ഥാനമാക്കിയും ചില സംസ്ഥാനങ്ങളെ അവഗണിച്ചും ഭാരത ഭൂപടത്തെ വികൃതമാക്കി ഇടത് അധ്യാപക സംഘടനയുടെ ഡയറി .സിപിഐയുടെ അധ്യാപക സംഘടനയായ എകെഎസ്ടിയുവിന്റെ ഡയറിയിലാണ് ഭാരതത്തിന്റെ വിചിത്ര ഭൂപടം.
കാശ്മീര്‍ പാകിസ്ഥാന്റെ ഭാഗമാക്കിയ നിലയിലാണ് ഭൂപടത്തില്‍ ചിത്രീകരിച്ചിരിക്കുന്നത്. അയല്‍ രാജ്യങ്ങളില്‍ പാക്കിസ്ഥാന് നല്‍കിയിരിക്കുന്ന കളറിലാണ് കാശ്മീരിന്റെ ഒഴിവാക്കിയ ഭാഗത്തിനും നല്‍കിയിരിക്കുന്നത്.
ചൈനയോട് ചേര്‍ന്ന് കിടക്കുന്ന ലഡാക്കിന്റെ ഭാഗവും പാക്ക് അധീന കാശ്മീരിനോട് ചേര്‍ന്നു കിടക്കുന്ന കാശ്മീരിന്റെ ഭാഗവുമാണ് ഇല്ലാത്തത്. പകരം ഈ ഭാഗം പ്രത്യേകം വരയിട്ട് ഭാരതത്തിന്റെ ഭാഗമല്ലെന്ന തരത്തില്‍ രാജ്യഭൂപടത്തിന്റെ തലയറുത്ത രീതിയിലാണ് ഉള്‍പ്പെടുത്തിയിരിക്കുന്നത്. ഹിമാചല്‍ പ്രദേശിനെ രണ്ട് ഭാഗമായും സിക്കിം സംരക്ഷിത ഭൂപ്രദേശമെന്നും കാണിച്ചിരിക്കുന്നു.
ഗുജറാത്തും മഹാരാഷ്‌ട്രയും ചേര്‍ന്ന് ബോംബെ സംസ്ഥാനവും തമിഴ്‌നാടിനെ മദ്രാസായും കര്‍ണാടകയെ മൈസൂര്‍ സംസ്ഥാനവുമാക്കിയാണ് ചിത്രത്തില്‍. പുതിയ സംസ്ഥാനങ്ങള്‍ ഒന്നും സ്ഥാനം പടിച്ചില്ല. ആകെ പതിനാറ് സംസ്ഥാനങ്ങള്‍ മാത്രമാണ് ഭൂപടത്തില്‍ ഉള്ളത്. വിദ്യാര്‍ത്ഥികളെ പഠിപ്പിക്കുന്ന അധ്യാപക സംഘടനയുടെ ഡയറിയില്‍ പ്രസിദ്ധീകരിച്ച ഭാരത ഭൂപടമാണ് ഇങ്ങനെ വികലമാക്കിയിരിക്കുന്നത്.
എകെഎസ്ടിയുവിന്റെ നടപടി രാജ്യവിരുദ്ധമാണെന്ന് ഇടത്അധ്യാപകര്‍തന്നെ പറയുന്നു. ശ്രദ്ധയില്‍പെട്ട അധ്യാപകര്‍ ഡയറി പിന്‍വലിക്കണമെന്ന് ആവശ്യപ്പെട്ടിട്ടും നേതാക്കള്‍ തയ്യാറായില്ല.
