തിരുവനന്തപുരം: സംസ്ഥാനത്ത് സ്വർണവിലയിൽ വീണ്ടും വൻ കുതിപ്പ്. ഇന്ന് ഓൾ കേരള ഗോൾഡ് ആൻ്റ് സിൽവർ മർച്ചൻ്റ്സ് അസോസിയേഷൻ പുറത്തുവിട്ട കണക്ക് പ്രകാരം ഒറ്റയടിക്ക് 22 കാരറ്റ് സ്വർണം പവന് 4840 രൂപയാണ് കൂടിയത്. ഇന്നത്തെ സ്വർണവില ഇങ്ങനെ : 22 ഗ്രാം സ്വർണം ഒരു ഗ്രാമിന് 14,715 രൂപ. ഒരു പവന് 1,17,720 രൂപ.കഴിഞ്ഞ രണ്ട് ദിവസമായി വന്നിരുന്ന ആശ്വാസകരമായ വാർത്തകൾക്കിടയിലാണ് ഇന്നത്തെ വർദ്ധനവ് ഉണ്ടായിരിക്കുന്നത്. ജനുവരി അവസാന ആഴ്ച വലിയ ചരിത്രക്കുതിപ്പുകൾക്ക് സാക്ഷ്യം വഹിച്ച വിപണി പിന്നീട് താഴോട്ടിറങ്ങിയിരുന്നു.
ഇതിന് പിന്നാലെയാണ് കഴിഞ്ഞ ദിവസങ്ങളിൽ വൻ ഇടിവുണ്ടായത്. എന്നാൽ ഇന്നലെ രാവിലെ ഉണ്ടായ ഇടിവിന് പിന്നാലെ വൈകുന്നേരം 1600 രൂപയുടെ വർദ്ധനവാണ് വിപണിയിലുണ്ടായത് എന്നതും ശ്രദ്ധേയമാണ്.അന്താരാഷ്ട്ര വിപണിയിൽ സ്വർണ്ണവില ഔൺസിന് 5,600 ഡോളർ എന്ന റെക്കോർഡ് നിലവാരത്തിൽ നിന്ന് 4,600 ഡോളറിലേക്ക് കൂപ്പുകുത്തിയതാണ് കഴിഞ്ഞ ദിവസങ്ങളിൽ ആഭ്യന്തര വിപണിയിലും പ്രതിഫലിച്ചത്. അമേരിക്കൻ ഫെഡറൽ റിസർവിലെ നേതൃമാറ്റവും പലിശ നിരക്കുകളിൽ വന്നേക്കാവുന്ന മാറ്റങ്ങളുമാണ് നിക്ഷേപകരെ സ്വർണ്ണത്തിൽ നിന്ന് താൽക്കാലികമായി പിന്തിരിപ്പിച്ചത്.
സംസ്ഥാനത്ത് സ്വർണവിലയിലെ റെക്കോർഡ് ഉയരം ജനുവരി 29നാണ് രേഖപ്പെടുത്തിയത്. അന്ന് 1.31 ലക്ഷം കടന്ന് സ്വർണവില ചരിത്രത്തിലെ ഏറ്റവും വലിയ ഉയരത്തിലെത്തിയിരുന്നു. എന്നാൽ കുറഞ്ഞ് വിലയ്ക്ക് സ്വർണം വാങ്ങിയ നിക്ഷേപകർ ഈ ഘട്ടത്തിൽ സ്വർണം വിറ്റ് പരമാവധി ലാഭമുണ്ടാക്കാൻ ശ്രമിച്ചതോടെയാണ് സ്വർണവില താഴേക്ക് പോയത്.
