ഒന്നിച്ച് ജീവിച്ച് അവര്‍ ഒന്നിച്ച് വിടപറഞ്ഞു, അവശനിലയില്‍ കണ്ടെത്തിയ മൂന്നാമത്തെ സഹോദരിയും മരിച്ചു

തൃശൂര്‍: മുള്ളൂര്‍ക്കരയില്‍ വിഷം കഴിച്ച് അവശനിലയില്‍ കണ്ടെത്തിയ സഹോദരിമാരില്‍ മൂന്നാമത്തെയാളും മരിച്ചു. വെള്ളിയാഴ്ചയാണ് മൂവരെയും വീടിനുള്ളില്‍ അവശനിലയില്‍ കണ്ടെത്തിയത്. ഇളയ സഹോദരി സരോജിനി (75) അന്നു തന്നെ മരിച്ചിരുന്നു. മെഡിക്കല്‍ കോളേജില്‍ ചികിത്സയിലിരിക്കെ മൂത്ത സഹോദരി ദേവകി ശനിയാഴ്ചയും (83) , ശേഷിച്ച സഹോദരി ജാനകി (80) ഇന്നും മരിച്ചു.
മുള്ളൂര്‍ക്കര മണ്ഡലംകുന്നിലാണ് സംഭവമുണ്ടായത്. വാര്‍ധക്യത്തിന്‌റെ ദുരിതങ്ങളും മറ്റുമാണ് ജീവനൊടുക്കാന്‍ ഇവരെ പ്രേരിപ്പിച്ചതെന്നു കരുതുന്നു.
വെള്ളിയാഴ്ച ആരെയും പുറത്തു കാണാഞ്ഞ് അയല്‍വാസികള്‍ വീട്ടിലെത്തിയപ്പോഴാണ് മൂവരെയും വിഷം കഴിച്ച് അവശ നിലയില്‍ കണ്ടെത്തിയത്. അവര്‍ അറിയിച്ചതനുസരിച്ച് എത്തിയ പൊലീസ് വൃദ്ധകളെ ജില്ലാ ആശുപത്രിയില്‍ എത്തിക്കുകയായിരുന്നു. തങ്ങളുടെ സ്വത്തുക്കള്‍ ഒരു ദേവസ്വത്തിന് എഴുതിവച്ചതായി കാണിക്കുന്ന ആത്മഹത്യാക്കുറിപ്പ് പൊലീസ് വീട്ടില്‍ നിന്ന് കണ്ടെടുത്തിരുന്നു.