ന്യൂദല്ഹി: റിപ്പബ്ലിക്കിനെ കൂടുതല് ശക്തിപ്പെടുത്താന് രാഷ്ട്രം പ്രഥമം എന്ന മനോഭാവത്തോടെ ഒരുമിച്ച് പ്രവര്ത്തിക്കാമെന്ന് രാഷ്ട്രപതി ദ്രൗപദി മുര്മു. ദേശസ്നേഹം കൂടുതല് ശക്തിപ്പെടുത്താനുള്ള അവസരമാണ് റിപ്പബ്ലിക് ദിനമെന്ന് വിശ്വസിക്കുന്നതായും അവര് റിപ്പബ്ലിക് ദിനത്തലേന്ന് രാഷ്ട്രത്തോട് നടത്തിയ അഭിസംബോധനയില് പറഞ്ഞു.
ശ്രീനാരായണ ഗുരുദേവന്റെ വചനവും രാഷ്ട്രപതി പ്രസംഗത്തില് ഉദ്ധരിച്ചു. ‘ജാതിഭേദം മതദ്വേഷം ഏതുമില്ലാതെ സര്വരും സോദരത്വേന വാഴുന്ന മാതൃകാ സ്ഥാനമാണിത്’ എന്ന വചനമാണ് രാഷ്ട്രപതി സംഭാഷണത്തില് ഉള്പ്പെടുത്തിയത്. കേരളത്തില് ജനിച്ച മഹാനായ കവിയും സാമൂഹ്യ പരിഷ്കര്ത്താവും ആത്മീയാചാര്യനുമായ ശ്രീനാരായണ ഗുരുവിന്റെ ചിന്ത അദ്ദേഹത്തിന്റെ തന്നെ വാക്കുകളില് അവതരിപ്പിക്കാന് ആഗ്രഹിക്കുന്നുവെന്ന് പറഞ്ഞാണ് രാഷ്ട്രപതി വചനങ്ങള് ഉദ്ധരിച്ചത്. പുരാതന കാലം മുതല് നമ്മുടെ സംസ്കാരവും നാഗരികതയും ആത്മീയ പാരമ്പര്യവും മാനവികതയ്ക്ക് ഏറെ ഗുണം ചെയ്തിട്ടുണ്ട്. ആയുര്വേദത്തെയും യോഗയെയും പ്രാണായാമത്തെയും ആഗോള സമൂഹം അഭിനന്ദിക്കുകയും ഏറ്റെടുക്കുകയും ചെയ്തു. നിരവധി മഹദ്വ്യക്തികള് രാജ്യത്തെ ആത്മീയവും സാമൂഹ്യവുമായ ഐക്യത്തിന്റെ പ്രവാഹം നിരന്തരം സമ്പന്നമാക്കിയെന്നും രാഷ്ട്രപതി പറഞ്ഞു.
വികസിതഭാരതം കെട്ടിപ്പടുക്കുകയെന്നത് രാജ്യത്തെ എല്ലാ പൗരന്മാരുടെയും കൂട്ടായ ഉത്തരവാദിത്തമാണെന്നും രാഷ്ട്രപതി അഭിപ്രായപ്പെട്ടു. സമൂഹത്തിന് അപാരമായ ശക്തിയുണ്ട്. സര്ക്കാരിന്റെ പരിശ്രമങ്ങള്ക്ക് സമൂഹത്തിന്റെ സജീവ പിന്തുണ ലഭിക്കുമ്പോള് വിപ്ലവകരമായ മാറ്റങ്ങള് സംഭവിക്കുന്നു.
രാജ്യത്തെ ജനങ്ങള് ഡിജിറ്റല് പണമിടപാട് സംവിധാനം വന്തോതില് സ്വീകരിച്ചിരിക്കുന്നു. ഇന്ന് ലോകത്തെ ഡിജിറ്റല് പണമിടപാടുകളുടെ പകുതിയിലേറെയും ഭാരതത്തിലാണ് നടക്കുന്നത്. ചെറിയ കടകളില് നിന്ന് സാധനങ്ങള് വാങ്ങുന്നത് മുതല് ഓട്ടോറിക്ഷാ കൂലി നല്കുന്നത് വരെ ഡിജിറ്റല് പണമിടപാടിന്റെ ഉപയോഗം ആഗോള സമൂഹത്തിന് മുന്നില് ശ്രദ്ധേയമാതൃകയായി മാറിയിരിക്കുന്നു. മറ്റ് ദേശീയ ലക്ഷ്യങ്ങള് കൈവരിക്കുന്നതിലും രാജ്യത്തെ എല്ലാ പൗരന്മാരും ഇതുപോലെ സജീവമായി പങ്കുചേരുമെന്ന് പ്രതീക്ഷിക്കുന്നുവെന്നും രാഷ്ട്രപതി പറഞ്ഞു.
