തിരുനാവായ: ഭാരതപ്പുഴയുടെ ഉത്ഭവസ്ഥാനമായ തിരുമൂര്‍ത്തി മലയില്‍ നിന്ന് ശ്രീചക്ര മഹാമേരുവുമായുള്ള രഥയാത്ര ഇന്ന് കല്‍പ്പാത്തിയില്‍ പുനരാരംഭിക്കും. സപ്തനദികളെ പ്രതീകവല്‍ക്കരിക്കുന്ന ഏഴുചാലുകളായൊഴുകുന്ന ഭാരതപ്പുഴയുടെ ഉത്ഭവസ്ഥാനമാണ് തിരുമൂര്‍ത്തി മല. ശ്രീചക്രപൂജ, ഗോപൂജ, നദീപൂജ എന്നിവയ്‌ക്ക് ശേഷമാണ് രഥയാത്ര തിരുമൂര്‍ത്തിമലയില്‍ നിന്ന് ആരംഭിച്ചത്. പിന്നീട് തമിഴ്‌നാട് സര്‍ക്കാര്‍ അനുമതി നിഷേധിച്ചതിനെ തുടര്‍ന്നാണ് യാത്ര ഇന്ന് കല്‍പ്പാത്തിയില്‍ നിന്ന് പുന:രാരംഭിക്കുന്നത്.
ഗണേശജയന്തി ദിവസമായ 22ന് തിരുനാവായ മഹാമാഘമഹോത്സവ വേദിയില്‍ രഥയാത്രക്ക് സമാപനമാകും. വടക്കുംതറ, യാക്കര, കൊടുന്തിരപ്പള്ളി അഗ്രഹാരം, അണിക്കോട് ആശ്രമം, മങ്കര, പാമ്പാടി സോമേശ്വരം, തിരുവില്വാമല എന്നിവിടങ്ങളിലെ സ്വീകരണങ്ങള്‍ക്ക് ശേഷം യാത്ര കുത്താംപള്ളിയില്‍ സമാപിക്കും. 22ന് രാവിലെ ശ്രീചിനക്കത്തൂര്‍ അമ്പല പരിസരത്ത് നിന്നാണ് യാത്ര ആരംഭിക്കുക. വൈകീട്ട് നാവാമുകുന്ദ ക്ഷേത്രപരിസരത്ത് എത്തും. ഇന്നലെ കൊല്ലങ്കോട് ആലമ്പള്ളം പഴയ ഗ്രാമം, ചൈതന്യ മഹാഗണപതിക്ഷേത്ര സന്നിധിയില്‍ നടന്ന രഥയാത്ര സത്സംഗം മഹാമണ്ഡലേശ്വര്‍ ആനന്ദവനം ഭാരതി മഹാരാജ് ഉദ്ഘാടനം ചെയ്തു. മഹാമാഘ മഹോത്സവത്തിന് പ്രതീക്ഷിച്ചതിലധികമുള്ള പിന്തുണയാണ് ലഭിക്കുന്നതെന്ന് അദ്ദേഹം പറഞ്ഞു.
