ന്യൂദല്ഹി: നിയമസഭാ തെരഞ്ഞെടുപ്പില് കേരളജനത ബിജെപിക്ക് അവസരം നല്കുമെന്ന് പ്രധാനമന്ത്രി നരേന്ദ്രമോദി. ബിജെപി ദേശീയ അധ്യക്ഷനായി നിതിന് നബിന് ചുമതലയേറ്റ ചടങ്ങില് സംസാരിക്കുകയായിരുന്നു പ്രധാനമന്ത്രി.
ജനങ്ങള്ക്ക് ബിജെപിയിലുള്ള വിശ്വാസം വര്ധിക്കുന്നതിന്റെ തെളിവാണ് കേരളത്തിലെയും മഹാരാഷ്ട്രയിലെയും തദ്ദേശ തെരഞ്ഞെടുപ്പുകളിലെ വിജയം. നിയമസഭാ തെരഞ്ഞെടുപ്പില് കേരളജനത ബിജെപിക്ക് അവസരം നല്കും. ഇതിന് മുന്നോടിയായാണ് തിരുവനന്തപുരത്തെ 45 വര്ഷത്തെ ഇടതുഭരണം അവസാനിപ്പിച്ച് ബിജെപി മേയറെ ജനം തെരഞ്ഞെടുത്തത്. മഹാരാഷ്ട്രയിലെ തദ്ദേശസ്വയംഭരണ സ്ഥാപനങ്ങളില് ബിജെപി ഒന്നാം നമ്പര് പാര്ട്ടിയായി. മുംബൈ മുന്സിപ്പല് കോര്പ്പറേഷനില് ബിജെപി ഏറ്റവും വലിയ ഒറ്റകക്ഷിയായി. അധികാരം സേവനത്തിനുള്ള മാധ്യമമാക്കി ബിജെപി മാറ്റി. ബിജെപിയുടെ ആശയവും ആവേശവും ദേശീയതയാണെന്നും നിതിന് നബിന് ഇനി മുതല് താനടക്കമുള്ള ബിജെപി പ്രവര്ത്തകരുടെ ബോസ് ആണെന്നും അഭിനന്ദനങ്ങളും ആശംസകളും നേര്ന്ന പ്രധാനമന്ത്രി പറഞ്ഞു.
സ്ഥാനമൊഴിഞ്ഞ ദേശീയ അധ്യക്ഷന് ജെ.പി. നഡ്ഡയും സംസ്ഥാനത്തെ ബിജെപിയുടെ വിജയം എടുത്തുപറഞ്ഞു. തിരുവനന്തപുരത്തെ വിജയത്തിന് പുറമെ ലോക്സഭാ തെരഞ്ഞെടുപ്പിലെ വിജയവും ജെ.പി. നഡ്ഡ ചൂണ്ടിക്കാട്ടി. രാഷ്ട്രം ആദ്യം എന്ന ആദര്ശം മുറുകെപ്പിടിച്ച് പാര്ട്ടിയെ നയിക്കുമെന്ന് ചുമതല ഏറ്റെടുത്തശേഷമുള്ള ആദ്യപ്രസംഗത്തില് നിതിന് നബിന് വ്യക്തമാക്കി. കഠിനപ്രയത്നത്തിലൂടെയും ജനങ്ങള്ക്ക് നല്കിയ വാഗ്ദാനങ്ങള് പാലിച്ചുമാണ് ബിജെപി ലോകത്തിലെ ഏറ്റവും വലിയ രാഷ്ട്രീയ പാര്ട്ടിയായത്. പ്രവര്ത്തകരുടെ തപസും ത്യാഗവും കഠിനപരിശ്രമവുമാണ് പാര്ട്ടിക്ക് കരുത്തായത്.
തിരുപ്രംകുണ്ഡ്രത്ത് കാര്ത്തിക ദീപം തെളിയിക്കുന്നത് തടസപ്പെടുത്താന് പ്രതിപക്ഷപാര്ട്ടികള് ശ്രമിച്ചത് അസാധാരണമാണ്. സാംസ്കാരികവും ആത്മീയവുമായ പാരമ്പര്യങ്ങളെ തകര്ക്കാനുള്ള മനഃപൂര്വമായ ഗൂഢാലോചനയാണ് ഇത്. അദ്ദേഹം പറഞ്ഞു.
