പാലക്കാട്: സമൂഹത്തിന് ദിശാബോധം നല്കുന്ന രീതിയില് ഭാരതത്തിന്റെ സാംസ്കാരിക തനിമ ഉയര്ത്തിപ്പിടിക്കുന്ന രീതിയില് എല്ലാ കലകളെയും ഒരുപോലെ പ്രോത്സാഹിപ്പിക്കണമെന്ന് മുതിര്ന്ന പ്രചാരകന് എസ്.സേതുമാധവന് അഭിപ്രായപ്പെട്ടു. തപസ്യ സുവര്ണ ജൂബിലിയുടെ ഭാഗമായി വടക്കന്തറ അശ്വതി കല്യാണമണ്ഡപത്തില് കഴിഞ്ഞ നാലുദിവസമായി നടന്നുവന്ന രാജ്യന്തര സംഗീതോത്സവ സമാപനത്തില് സുവര്ണജയന്തി സന്ദേശം നല്കി സംസാരിക്കുകയായിരുന്നു അദ്ദേഹം.
തപസ്യ സംസ്ഥാന വര്ക്കിംങ് പ്രസിഡന്റ് പ്രൊഫ. പി.ജി. ഹരിദാസ് അധ്യക്ഷത വഹിച്ചു.
പുരാതനകാലം മുതല് തന്നെ ഭാരതം എല്ലാ കലകളെയും പ്രോത്സാഹിപ്പിച്ചിരുന്നു. ലോകത്തിനുതന്നെ കലയില് മഹത്തായ സംഭാവന നല്കിയ രാജ്യമാണ് ഭാരതം. ഭൗതിക സുഖം മാത്രമല്ല ഇതിലൂടെ ലക്ഷ്യമാക്കിയിരുന്നത്. മറിച്ച്, കലയിലൂടെ സദാചാരപരവും ആന്തരികവും ശ്രേഷ്ഠവുമായ ഉയര്ച്ചയായിരുന്നു ലക്ഷ്യമാക്കിയിരുന്നത്. ഈ സംസ്കാരത്തെ തകര്ക്കാന് വിദേശശക്തികള് ശ്രമിച്ചെങ്കിലും അതിനെയെല്ലാം മറികടക്കാന് കഴിഞ്ഞു. സമസ്ത രംഗങ്ങളിലും ഒരുകാലത്ത് ജഗദ്ഗുരു സ്ഥാനം ഭാരതം അലങ്കരിച്ചിരുന്നു പിന്നീട് പല കാരണങ്ങളാലും അത് നഷ്ടമായെങ്കിലും ഇന്നത് തിരിച്ചുപിടിക്കാനുള്ള ശ്രമമാണ് നടക്കുന്നത്. സംസ്കാരമെന്നത് ധാര്മികമായി ഒരു തലമുറയെ ഒന്നിപ്പിക്കുക എന്ന ദൗത്യമാണ് നിര്വ്വഹിക്കുന്നത്. എന്നാല് ഇന്നത്തെ യുവതലമുറയെ വഴിതെറ്റിക്കാനുള്ള ശ്രമമാണ് വ്യാപകമായി നടക്കുന്നതെന്ന് അദ്ദേഹം ഉദാഹരണ സഹിതം ചൂണ്ടിക്കാട്ടി.
അത് മാറ്റിയെടുക്കേണ്ട ദൗത്യം തപസ്യപോലുള്ള സാംസ്കാരിക സംഘടനകള്ക്കുണ്ട്.
സംസ്കാര് ഭാരതി അഖിലേന്ത്യ സംഘടനാ സെക്രട്ടറി അഭിജിത്ത് ഗോഖലെ, ദേശീയാധ്യക്ഷന് ഡോ. മൈസൂര് മഞ്ജുനാഥ്, ജന. സെക്രട്ടറി പണ്ഡിറ്റ് ഡോ. അശ്വിന് മഹേഷ് ദാല്വി, ദേശീയ സമിതിയംഗം കെ. ലക്ഷ്മിനാരായണന്, സംസ്ഥാന സംഘടനാ സെക്രട്ടറി രജിത്കുമാര്, തപസ്യ സംസ്ഥാന ജന. സെക്ര. കെ.ടി. രാമചന്ദ്രന്, ജനറല് കണ്വീനര് വി.എസ്. മുരളീധരന്, സംഗീതോത്സവം സംയോജകന് കെ.വി. രാജീവ് സംസാരിച്ചു. തപസ്യ സുവര്ണോത്സവവുമായി ബന്ധപ്പെട്ട് സംഘടിപ്പിച്ച മത്സര വിജയികള്ക്കുള്ള സമ്മാന വിതരണവും നടന്നു.
രാവിലെ നടന്ന സെമിനാറില് തപസ്യ സംസ്ഥാന വൈസ് പ്രസിഡന്റ് കല്ലറ അജയന് ആമുഖഭാഷണം നടത്തി. സംസ്കാര് ഭാരതി ദക്ഷിണക്ഷേത്ര പ്രമുഖ് തിരൂര് രവീന്ദ്രന് അധ്യക്ഷത വഹിച്ചു. രണ്ടാമത്തെ സെമിനാറില് തപസ്യ സംസ്ഥാന ജോ. ജന. സെക്ര സി.സി. സുരേഷ് ആമുഖഭാഷണവും, ജോ. സെക്രട്ടറി അനൂപ് കുന്നത്ത് അധ്യക്ഷതയും വഹിച്ചു. തുടര്ന്ന് അനന്ത പത്മനാഭനും, സംഘവും അവതരിപ്പിച്ച ‘വീണാ നാദം’ പരിപാടി അരങ്ങേറി. സമാപന ഇനമായ ‘ഗ്രാന്റ് വേള്ഡ് മ്യൂസിക് കണ്സര്ട്ടി ‘ല് മാര്ക്ക് ട്യൂണിസ്ട്ര (ഫ്രാന്സ്), ജൂലിയസ് ഗബ്രിയേല് (ജര്മ്മനി), ഓന് വാന് ജീല് (ഹോളണ്ട്), നെഡ് മാക് ഗോവന് (നെതര്ലാന്റ്), ലോറന്റ് പെക്കില്സ് (ലക്സംബര്ഗ്), ബെന്ജി (മാള്ട്ട), പ്രണവ് ദത്ത് (ഇന്ത്യ), സുമന്ത് മഞ്ചുനാഥ് (ഇന്ത്യ) തുടങ്ങിയവര് പങ്കെടുത്തു.
