തൃശൂര്‍:വനത്തിനുള്ളില്‍ നിന്നും നൃത്തത്തോടുള്ളഅഭിനിവേശം കൊണ്ടുമാത്രമാണ് ദാരിദ്ര്യത്തെയും തോല്‍പ്പിച്ച് ഇവര്‍ നൃത്തസ്വപ്‌നം തേടിയിറങ്ങിയത്. ചില കലാധ്യാപകര്‍ അവരെ ചേര്‍ത്തുപിടിച്ചപ്പോള്‍ ഗോത്രച്ചുവടുകള്‍ ശീലിച്ച കാലുകളില്‍ ചിലങ്ക കിലുങ്ങി. കൈളില്‍നാട്യമുദ്രകള്‍ വിരിഞ്ഞു. സംസ്ഥാന സ്‌കൂള്‍ കലോത്സവത്തിലെ നൃത്തതാരകങ്ങളായി. ഗോത്രകലകള്‍ കലോത്സവ വേദികള്‍ കീഴടക്കികഴിഞ്ഞു. പക്ഷെ ഭാരിച്ച ചെലവുകള്‍ കാരണം ഭരതനാട്യവും കുച്ചുപ്പുടിയും കേരളനടനവും മോഹിനിയാട്ടവുമൊക്കെ ഉന്നതികളിലെ(ഊരുകളിലെ) കുട്ടികള്‍ക്ക്ഇപ്പോഴും വിദൂര സ്വപ്‌നം മാത്രമാണ്.
കാസര്‍കോട് കടുമേനി ഉന്നതിലിയിലാണ് സച്ചു സതീഷ്. ആറ് വര്‍ഷം മുമ്പ് അച്ഛന് സതീഷ് മരണപ്പെട്ടു. കയറിക്കിടക്കാന്‍ സ്വന്തമായി വീടില്ലാത്ത, കൂലിപ്പണിയിലെവരുമാനം മാത്രമുള്ള അമ്മ ബിന്ദു, മകന്റെ കലാമോഹത്തിനായി മുണ്ട് മുറുക്കിയുടുത്തു. നൃത്താധ്യാപകന്‍ സതീഷ് നീലേശ്വരംസൗജന്യമായി നൃത്തവും ചമയവും നല്‍കി. എച്ച്എസ്എസ് ഭരതനാട്യത്തിനുംകുച്ചുപ്പുടിക്കും കേരള നടനത്തിനും എ ഗ്രേഡോടെയാണ് കാസര്‍കോട് കടുമേനി കമ്പല്ലൂര്‍ ജിഎച്ച്എസ്എസിലെ പ്ലസ്ടുക്കാരാന്‍ സച്ചു സതീഷ്കലോത്സവ വേദിയില്‍ നിന്നു മടങ്ങുന്നത്.
കാസര്‍കോട് കസബ മാലോത്ത് ജിഎച്ച്എസ്എസിലെപത്താം ക്ലാസുകാരന്‍ വിഷ്ണു ബാലകൃഷ്ണന് നൃത്തം പഠിക്കാന്‍ കാടിനുള്ളിലൂടെ അഞ്ച് കിലോമീറ്റര്‍ നടന്ന് 40 കിലോമീറ്റര്‍ ബസില്‍ യാത്ര ചെയ്യണം. പനതാങ്ങി കൊന്നക്കാട് മാവിലന്‍ സമുദായത്തിലെ താഴത്ത്‌വീട്ടില്‍ അമ്മ ദേവിയും വല്യമ്മ ശ്യാമളയും അസുഖബാധിതര്‍.തുച്ഛമായ വരുമാനത്തിലെ ഒരംശം വിഷ്ണുവിന്റെ സ്വപനത്തിനായി മാറ്റിവച്ചു. കലാമണ്ഡലം അജിത വിഷ്ണുവിനെമകനായി സ്വീകരിച്ചു. കഴിഞ്ഞ വര്‍ഷത്തെപ്പോലെ എച്ച്എസ് നാടോടിനൃത്തത്തിന് എഗ്രേഡുണ്ട്. ഇന്നലെ ചിലങ്കയണിഞ്ഞ കുച്ചുപ്പുടിക്കുകൂടി എഗ്രേഡ് കിട്ടിയപ്പോള്‍ അജിത ടീച്ചറിനുള്ള ഗുരുദക്ഷിക്ക് ഇരട്ടി മധുരവും.
വയനാട് മാനന്തവാടി വരടിമൂല ഉന്നതിയിലെ അഭിഷേക് വിജയനും പുല്ലാര ഉന്നതിയിലെ വിദുല്‍കുമാറുംനൃത്തപഠനത്തിനായി കാടിറങ്ങിയപ്പോള്‍ നൃത്താധ്യാപകന്‍ സാബു തൃശ്ശിലേരികൈത്താങ്ങായി.നിത്യവൃത്തിക്ക് നെട്ടോട്ടമോടുന്ന മാതാപിതാക്കളുടെ മക്കളായ അഭിഷേകിനുംവിദുലിനും നൃത്തവും ചമയവും മാത്രമല്ല നൃത്തപഠനത്തിനുള്ള യാത്രാച്ചെലവും ഉള്‍പ്പെടെ സാബുവാണ് നല്‍കുന്നത്. മാനന്തവാടി പയ്യമ്പള്ളി സെന്റ് കാദറിന്‍സിലെ എട്ടാം ക്ലാസുകാരനായ അഭിഷേകിന്എച്ച്എസ് കേരള നടനത്തിനും നാടോടി നൃത്തത്തിനും എഗ്രേഡ് ഉണ്ട്. 2024ല്‍ വിദുലിന് നാടോടി നൃത്തത്തിന് എഗ്രേഡ് ഉണ്ടായിരുന്നു. ഇത്തവണ എച്ച്എസ് കുച്ചുപ്പുടിയിലായിരുന്നു മത്സരം.
നൃത്ത അധ്യാപകരുടെ സഹോയത്തോടെ ഈ നാലുപേര്‍ക്കെങ്കിലും കലോത്സവവേദിയിലേക്ക് എത്താനായി. അതേസമയം തൃശൂര്‍ പീച്ചി ജിഎച്ച്എസ്എസിലെ കെ.എം.മാളവികയെപ്പോലെ യ്യൂടൂബ് നോക്കിക്കളിച്ചും സ്വയം ചുവടുകളിട്ടും നൃത്ത മോഹങ്ങള്‍ അടക്കിവച്ച് ഗോത്രകളിലേക്ക് ഉള്‍വലിയേണ്ടിവന്ന നിരവധി കുട്ടികളുണ്ട് ഉന്നതികളില്‍. ചില കുഞ്ഞു മനസുകള്‍ നൃത്തസ്വപ്‌നങ്ങളെ ഉന്നതികളിലെ ദാരിദ്ര്യത്തില്‍ കുഴിച്ചുമൂടി. ചിലര്‍ ഇപ്പോഴും നൃത്തസ്വപനവുമായി കാത്തിരിക്കുന്നു…
