പാലക്കാട്: എന്തരോ മഹാനുഭാവുലു…. എന്ന ത്യാഗരാജ സ്വാമികളുടെ കീര്ത്തനത്തില് ലയിച്ച് കേന്ദ്ര സാംസ്കാരിക മന്ത്രി ഗജേന്ദ്രസിങ് ഷെഖാവത്ത്.
ക്ഷണിച്ചത് ഉദ്ഘാടനത്തിനാണെങ്കിലും പഞ്ചകീര്ത്തനം ആലപിക്കുന്ന സംഗീതജ്ഞര്ക്കൊപ്പം നിലത്തിരുന്ന് താളം പിടിക്കുകയായിരുന്നു മന്ത്രി. ഒരു കേന്ദ്രമന്ത്രി അടുത്തുവന്നിരുന്നത് അവരെയും അത്ഭുതപ്പെടുത്തി.
പാലക്കാട് വടക്കന്തറ അശ്വതി കല്യാണമണ്ഡപത്തില് നടക്കുന്ന തപസ്യ സുവര്ണ ജൂബിലി രാജ്യാന്തര സംഗീതോത്സവം ഉദ്ഘാടനം ചെയ്യാനെത്തിയതായിരുന്നു അദ്ദേഹം.
കേന്ദ്രമന്ത്രി വരുമ്പോള് പ്രശസ്തരായ സംഗീതജ്ഞരുടെ നേതൃത്വത്തില് ത്യാഗരാജസ്വാമികളുടെ പഞ്ചരത്നകീര്ത്തനാപലനം നടക്കുകയായിരുന്നു. ചെരിപ്പ് അഴിച്ചുവച്ച് അവര്ക്കൊപ്പം പങ്കുചേര്ന്നു. അരമണിക്കൂറോളമാണ് അദ്ദേഹം സംഗീതം ആസ്വദിച്ചത്. തുടര്ന്ന് സംഗീതജ്ഞരെ അഭിനന്ദിച്ച ശേഷമാണ് വേദിയിലേക്ക് കയറിയത്. അദ്ദേഹത്തിനൊപ്പം സംഗീത സംവിധായകന് ഔസേപ്പച്ചനും പങ്കെടുത്തു.
