മണ്ണ് നുള്ളിയിട്ടാല് താഴെ വീഴാത്ത തരത്തില് സ്ഥലമില്ലാത്ത സദസ്സ്. വേദിയില് കണ്ണഞ്ചിപ്പിക്കുന്ന പ്രകടനവുമായി മത്സരാര്ത്ഥികള്. 64ാം സംസ്ഥാന സ്കൂള് കലോത്സവത്തിന്റെ നാലാംദിനം സംഘനൃത്തം നടക്കുന്ന പ്രധാന വേദിയായ സൂര്യകാന്തി അക്ഷരാര്ത്ഥത്തില് കാണികളെ ത്രസിപ്പിക്കുകയായിരുന്നു. ഇതുവരെ ഒരു വേദിയിലും കാണാത്ത തരത്തിലുള്ള ജനക്കൂട്ടമാണ് വേദി ഒന്നില് നടന്ന എച്ച്എസ്എസ് വിഭാഗം സംഘനൃത്ത മത്സരത്തില് ഉണ്ടായത്. രാവിലെ എച്ച്എസ്എസ് വിഭാഗം ഭരതനാട്യത്തിന് ശേഷമാണ് സംഘനൃത്തം നടന്നത്. ഉച്ചയ്ക്ക് രണ്ടിന് ആരംഭിക്കേണ്ട സംഘനൃത്തം വൈകിട്ട് 4.30നാണ് തുടങ്ങിയത്. മത്സരം വൈകിയെങ്കിലും കാണികള് സംഘനൃത്തം കണ്ടിട്ടേ പോകൂ എന്ന മനോഭാവത്തില് കൊടുംചൂടിനെ അവഗണിച്ച് സീറ്റുകളില് നിന്ന് എഴുന്നേല്ക്കുകപോലും ചെയ്തില്ല. മത്സരം തുടങ്ങിയപ്പോള് മുതല് ഓരോ സംഘത്തിനും നിറഞ്ഞ പ്രോത്സാഹനമാണ് കാണികള് നല്കിയത്.
















