തിരുവനന്തപുരം: ശബരിമല സ്വര്ണക്കൊള്ള കേസില് റിമാന്ഡിലായ തിരുവിതാംകൂര് ദേവസ്വം ബോര്ഡ് മുന് അംഗവും സി പി ഐ നേതാവുമായ കെ.പി ശങ്കരദാസിനെ തിരുവനന്തപുരം മെഡിക്കല് കോളേജ് ആശുപത്രിയിലേക്ക് മാറ്റി. തിരുവനന്തപുരത്തെ സ്വകാര്യ ആശുപത്രിയില് ചികിത്സയില് ആയിരുന്ന കെ പി ശങ്കരദാസിനെ ജയില് ഉദ്യോഗസ്ഥര് എത്തിയാണ് മെഡിക്കല് കോളേജിലേക്ക് മാറ്റിയത്.
സ്വകാര്യ ആശുപത്രിയില് ചികിത്സയില് കഴിഞ്ഞ ശങ്കരദാസിനെ കൊല്ലം വിജിലന്സ് കോടതി ജഡ്ജി ആശുപത്രിയിലെത്തിയാണ് റിമാന്ഡ് ചെയ്തത്. കേസില് ശങ്കരദാസ് പതിനൊന്നാം പ്രതിയാണ്.ശങ്കരദാസിനെ പ്രത്യേക അന്വേഷണ സംഘം അറസ്റ്റ്ചെയ്യാത്തതിനെ ഹൈക്കോടതി രൂക്ഷമായി വിമര്ശിച്ചിരുന്നു. തുടര്ന്നാണ് എസ് പി ശശിധരന്റെ നേതൃത്വത്തിലുള്ള അന്വേഷണസംഘം ആശുപത്രിയിലെത്തി ശങ്കരദാസിന്റെ അറസ്റ്റ് രേഖപ്പെടുത്തിയത്. അറസ്റ്റ് വിവരം കോടതിയെ അറിയിക്കുകയും ചെയ്തു.
അതേസമയം,ശബരിമല സ്വര്ണക്കൊള്ള കേസില് നിര്ണായകമായ വിഎസ്എസ്സിയുടെ ശാസ്ത്രീയ പരിശോധനാ റിപ്പോര്ട്ട് പ്രത്യേക അന്വേഷണസംഘത്തിന് കൊല്ലം വിജിലന്സ് കോടതി കൈമാറി. ശാസ്ത്രീയ പരിശോധന ഫലം ഉള്പ്പെടുത്തി അന്വേഷണ റിപ്പോര്ട്ട് തിങ്കളാഴ്ച പ്രത്യേക അന്വേഷണസംഘം ഹൈക്കോടതിയില് സമര്പ്പിക്കും.
കഴിഞ്ഞ ദിവസമാണ് മുദ്രവെച്ച കവറില് വിഎസ്എസ്സി റിപ്പോര്ട്ട് കൊല്ലം വിജിലന്സ് കോടതിയില് സമര്പ്പിച്ചത്. യുബി ഗ്രൂപ്പ് 1998ല് പൊതിഞ്ഞ സ്വര്ണം തന്നെയാണോ പ്രത്യേക അന്വേഷണസംഘം കണ്ടെടുത്തത്, ദ്വാരപാലക ശില്പങ്ങളിലും കട്ടിളയിലും ഇപ്പോള് പൊതിഞ്ഞിട്ടുള്ള സ്വര്ണവും യുബി ഗ്രൂപ്പ് പൊതിഞ്ഞ സ്വര്ണവും തമ്മില് വ്യത്യാസമുണ്ടോ, സ്വര്ണത്തിന്റെ പുരാവസ്തു മൂല്യം ,നഷ്ടപ്പെട്ട സ്വര്ണത്തിന്റെ മൂല്യം എന്നീ വിവരങ്ങള് റിപ്പോര്ട്ടിലുണ്ടാകും.
