നൃത്തഗീതവാദ്യങ്ങള് പകര്ന്നു നല്കുന്ന ശുദ്ധകലയുടെ അനുഭൂതിക്കൊപ്പം തന്നെ കലാവതരണങ്ങള് ശക്തമായ സാമൂഹ്യവിമര്ശനത്തിനുള്ള ആയുധം കൂടിയാണെന്ന് ഓര്മ്മിപ്പിക്കുന്നതായിരുന്നു മൂന്നാം നാളിലെ കലോത്സവ വേദിയിലെ മോണോആക്ട് മത്സരം.
മോണോആക്ട് എച്ച്എസ് വിഭാഗം ആണ്കുട്ടികളുടെ മത്സരമാണ് ആനുകാലിക വിഷയങ്ങളുടെ വിമര്ശനവേദിയായത്. കിടങ്ങാനൂര് എസ്വിജിവിഎച്ച്എസ്എസ് സ്കൂളിലെ പത്താം ക്ലാസ് വിദ്യാര്ത്ഥിയായ കൃഷ്ണനുണ്ണി അവതരിപ്പിച്ച വിഷയം ശബരിമലയിലെ സ്വര്ണക്കൊള്ളയാണ്. സര്വതും കൊള്ളയടിക്കപ്പെടുന്ന ഈ കാലഘട്ടത്തില് ഈശ്വരന്മാര് പോലും സുരക്ഷിതരല്ലെന്നാണ് കൃഷ്ണനുണ്ണി തന്റെ ഏകാംഗ അഭിനയത്തിലൂടെ തുറന്നുകാട്ടിയത്. ചാക്യാര്കൂത്ത്, മിമിക്രി എന്നീ വിഷയങ്ങളിലും കൃഷ്ണനുണ്ണി മത്സരിച്ചിരുന്നു.
1996-ല് കലാപ്രതിഭ ആയിരുന്ന ഡോ. ശ്രീഹരി ജി.കെ.യുടെ മകനാണ് കൃഷ്ണനുണ്ണി.
