മലയാളം കവിതാ രചനയില്‍ മൂന്നാം തവണയും എ ഗ്രേഡ് നേടിയ കെ.വി. മസ്‌നയ്‌ക്ക് ഇക്കുറി ഉപന്യാസ രചനയിലും എ ഗ്രേഡ്. കണ്ണൂര്‍ സ്വദേശിയായ മെസ്ന ഈ വര്‍ഷം പാലക്കാട്ട് നടന്ന സാമൂഹ്യ ശാസ്ത്രമേളയിലും എ ഗ്രേഡ് ലഭിച്ചിട്ടുണ്ട്. തളിപ്പറമ്പ് ടാഗോര്‍ വിദ്യാനികേതന്‍ പ്ലസ് വണ്‍ വിദ്യാര്‍ഥിനിയാണ്.
സംസ്ഥാന സര്‍ക്കാരിന്റെ ഉജ്ജ്വല ബാല്യം പുരസ്‌കാരം, മുല്ലനേഴി കാവ്യപ്രതിഭാ പുരസ്‌കാരം, ഗാന്ധി പുരസ്‌കാരം, മലയാള കാവ്യസാഹിതിയുടെ സംസ്ഥാന കവിതാപുരസ്‌കാരം എന്നിവയുള്‍പ്പെടെ നിരവധി നേട്ടങ്ങള്‍ മെസ്ന ഇതിനോടകം കരസ്ഥമാക്കിയിട്ടുണ്ട്. സിബിഎസ്ഇ ഏഴാം ക്ലാസ്സ് മലയാളം പാഠപുസ്തകത്തില്‍ മെസ്ന എഴുതിയ ‘കാലം തെറ്റിയ മഴ’ എന്ന കവിത കുട്ടികള്‍ക്ക് പഠിക്കാനുണ്ട്. അധ്യാപകരായ കെ.വി. മെസ്മറിന്റെയും കെ.കെ. ബീനയുടെയും മകളാണ്.
പൗരുഷത്തിന്റെ തട്ടില്‍ പെണ്‍കരുത്തിന്റെ പോരാട്ടവീര്യം
പരമ്പരാഗതമായി പുരുഷന്മാരുടെ കുത്തകയായിരുന്ന ചവിട്ടുനാടക വേദികള്‍ ഇത്തവണയും പെണ്‍കരുത്തിന്റെ സാന്നിധ്യത്താല്‍ ചരിത്രം കുറിച്ചിരിക്കുകയാണ്. കഴിഞ്ഞ കുറച്ചു വര്‍ഷങ്ങളായി ചവിട്ടുനാടകത്തില്‍ പെണ്‍കുട്ടികളുടെ പങ്കാളിത്തം ക്രമാതീതമായി വര്‍ധിച്ചുവരുന്നത് കേവലം ഒരു താല്‍ക്കാലിക മാറ്റമല്ല, മറിച്ച് കാലഘട്ടത്തിന്റെ അനിവാര്യതയാണെന്ന് ഈ പ്രകടനം തെളിയിക്കുന്നു. ആണ്‍കുട്ടികളുടെ പങ്കാളിത്തം കുറഞ്ഞുവരുന്ന സാഹചര്യത്തില്‍ ഈ കലാരൂപത്തെ തനിമ ചോരാതെ സംരക്ഷിക്കുന്നത് ഇന്ന് പെണ്‍പടയാണ്.
ക്രിസ്തീയ വീരഗാഥകള്‍ക്കപ്പുറം ഷേക്‌സ്പിയറുടെ ‘മാക്ബത്ത്’ പോലുള്ള പതിഞ്ഞ താളത്തിലുള്ള ട്രാജഡികള്‍ക്ക് അവര്‍ നല്‍കുന്ന ഭാവതീവ്രതയും, ചുവടുകളിലെ ചടുലതയും പൗരുഷത്തിന്റെ പോരാട്ടവീര്യത്തിന് ഒട്ടും കുറവല്ലെന്ന് അടിവരയിടുന്നു. ശൈലിയിലും ഗാനാവരണത്തിലും കാലോചിതമായ മാറ്റങ്ങള്‍ വരുത്തുമ്പോഴും, തട്ടുപൊളിപ്പന്‍ താളത്തിനൊപ്പം ലയിച്ചുചേരുന്ന ഇവരുടെ അര്‍പ്പണബോധം ചവിട്ടുനാടകത്തിന്റെ ഭാവി സുരക്ഷിതമാണെന്ന പോസിറ്റീവായ സന്ദേശമാണ് കലോത്സവ വേദികളില്‍ നല്‍കുന്നത്.
