തൃശൂര്: റിതിക കേരള നടനമാടന് വേദിയില് കയറിയപ്പോള് പഴയ കലാതിലകമായ അമ്മ ഓര്മ്മിക്കുക ആയിരുന്നു അന്നത്തെ കാലം. 2002, 2003 കാലഘട്ടങ്ങളില് കലാതിലകം ആയിരുന്നു റിതിക ജ്യോതിഷിന്റെ അമ്മ ഷൈമ. അന്ന് മോഹിനിയാട്ടത്തിന്റെയും ഓട്ടംതുള്ളലിന്റെയും എല്ലാം വേദികളില് ഷൈമ നിറസാന്നിധ്യമായിരുന്നു.
ഹൈസ്കൂള് വിഭാഗം പെണ്കുട്ടികളുടെ കേരള നടനം മത്സരത്തില് പങ്കെടുക്കാന് എത്തിയതാണ് ഇന്ന് റിതിക. അമ്മയാണ് നൃത്തത്തില് റിതികയുടെ ഗുരു. ‘അന്ന് അവസരങ്ങള് ഉണ്ടായിരിന്നു, എത്ര മത്സരങ്ങളില് വേണമെങ്കിലും പങ്കെടുക്കാം. അന്ന് ഞാന് മത്സരിക്കുമ്പോള് ഒപ്പമുണ്ടായിരുന്ന അമ്പിളി ദേവിയും നവ്യ നായരും എല്ലാം ഇന്ന് ചലച്ചിത്രതാരങ്ങളാണ്’, ഷൈമ ഓര്മ്മിച്ചു.
ഇന്ന് മത്സരിക്കാവുന്ന ഇനങ്ങള് പരിമിതമാക്കിയപ്പോള് കുട്ടികളുടെ അവസരങ്ങള് കുറഞ്ഞു. അതുകൊണ്ട് ഓരോ വര്ഷവും ഓരോ ഇനങ്ങളിലാണ് മകള് മത്സരിക്കുന്നത്. അമ്മ എന്ന നിലയിലോ നൃത്ത അധ്യാപിക എന്ന നിലയിലോ മകളെ വിലയിരുത്താന് താന് ആളല്ലെന്ന നിലപാടിലാണ് അമ്മ. ടിഎംവിഎച്ച്എസ്എസ് പെരുമ്പിലാവ് സ്കൂളിലെ 8ാം ക്ലാസ് വിദ്യാര്ഥിയാണ് റിതിക. അച്ഛന് ജ്യോതിഷ് മേക്ക്അപ് ആര്ട്ടിസ്റ്റ് ആണ്. സദനം റഷീദ് ആണ് കേരള നടനത്തില് റിതികയുടെ ഗുരു.
