തൃശൂര്: കലയുടെ കാല്ച്ചിലമ്പൊലി കേട്ടുണര്ന്ന് തൃശൂര്. സാംസ്കാരിക നഗരിയില് കലയുടെ പൂരത്തിന് ഇന്ന് കൊടിയേറ്റം. 25 പൂക്കളുടെ പേരുകളില് ഒരുങ്ങി നില്ക്കുന്ന വേദികളില് 12,000ത്തിലേറെ പ്രതിഭകള് കലാപ്രകടനങ്ങളുമായി നിറയും. തൃശൂരില് ഇത് കലയുടെ പൂക്കാലം.
സാഹിത്യവും സംഗീതവും നാട്യവും മേളിക്കുന്ന കലോത്സവ വേദികള് ഇക്കുറിയും പുതിയ പ്രതിഭകള്ക്ക് പിറവിയേകും. ഭാവി കേരളത്തിന്റെ സാംസ്കാരിക ഭൂപടത്തെ അടയാളപ്പെടുത്തുന്ന താരങ്ങളായി അവര് മാറും. കലോത്സവങ്ങള് പുതിയ കാലത്തെക്കുറിച്ചുള്ള പ്രതീക്ഷകള് കൂടിയാകുന്നത് അങ്ങനെയാണ്. ഈ കലോത്സവത്തിലും മലയാളനാട് കാത്തിരിക്കുകയാണ് പ്രതിഭകളുടെ മിന്നലാട്ടങ്ങള്ക്കായി. ആഘോഷങ്ങളെ നെഞ്ചേറ്റുന്നതില് ഒരുപടി മുന്നിലായ തൃശൂര് പതിവ് തെറ്റിച്ചിട്ടില്ല ഇക്കുറിയും. കലോത്സവത്തെ മറ്റൊരു തൃശൂര് പൂരമാക്കുകയാണ് ജനത.
ഇനി അഞ്ചുനാള് വേദികളില് നിന്ന് വേദികളിലേക്കുള്ള കലാപ്രേമികളുടെ ഒഴുക്കായിരിക്കും നഗരത്തില്.
പൂര്ണമായും ഹരിതചട്ടം പാലിച്ച് നടക്കുന്ന കലോത്സവം എന്ന പ്രത്യേകതയുമുണ്ട് ഇക്കുറി. മുഖ്യമന്ത്രി പിണറായി വിജയന് ഇന്ന് രാവിലെ 10ന് കലോത്സവത്തിന്റെ ഉദ്ഘാടനം നിര്വഹിക്കും. രാവിലെ ഒന്പതു മുതല് വേദികള് ഉണരും.
ജന്മഭൂമി ഓണ്ലൈന്