തൃശൂര്: തിക്കും തിരക്കുമില്ലാതെ ഒറ്റ ക്ലിക്കിന്റെ ദൂരത്തില് താമസസൗകര്യങ്ങളിലേക്ക് എത്താന് ഇത്തവണ സംസ്ഥാന സ്കൂള് കലോത്സവത്തില് ഡിജിറ്റല് അക്കമഡേഷന് ഒരുങ്ങുകയാണ്. പതിനായിരത്തിലേറെ മത്സരാര്ഥികള് എത്തുന്ന സംസ്ഥാന കലോത്സവത്തില് എല്ലാ വര്ഷവും നേരിടുന്ന പ്രധാന പ്രതിസന്ധികളില് ഒന്നാണ് താമസസൗകര്യങ്ങളിലേക്കുള്ള വഴിയറിയാതെയുള്ള നടത്തം. ഇത്തവണ ഇതിന് ഒരു പരിഹാരം കണ്ടെത്തുകയാണ് സംസ്ഥാന കലോത്സവ കമ്മിറ്റി.
മത്സരാര്ഥികളുടെയും അധ്യാപകരുടെയും താമസം നിയന്ത്രിക്കാന് ഡിജിറ്റല് അക്കമഡേഷന് സംവിധാനം പൂര്ണമായി നടപ്പാക്കുകയാണ് സംഘാടകര്. കിടക്കകള് അടക്കം അടിസ്ഥാന സൗകര്യങ്ങളോടെ 20 സ്കൂളുകളാണ് താമസകേന്ദ്രങ്ങളായി ഒരുക്കിയിരിക്കുന്നത്. ഇവയുടെ പൂര്ണ വിവരങ്ങള് ഡിജിറ്റല് രൂപത്തില് വിദ്യാര്ഥികള്ക്കും രക്ഷിതാക്കള്ക്കും ക്യു ആര് കോഡ് വഴി കൈമാറും. സ്കൂളുകളുടെ പേര് ഉള്പ്പെടുത്തിയ ക്യു ആര് കോഡ് സ്കാന് ചെയ്താല് ഗൂഗിള് മാപ്പ് വഴി അവിടേക്കുള്ള വഴി തെളിയും. നല്കിയിരിക്കുന്ന നമ്പറുകളില് ടാപ്പ് ചെയ്താല് നേരിട്ട് ആ നമ്പറിലേക്ക് കോള് പോകും. അടിസ്ഥാന വിവരങ്ങള് അറിയാനും ആവശ്യങ്ങള് അറിയിക്കാനും ഈ സംവിധാനം ഏറെ ഉപകാരപ്രദമാകും.
ആണ്കുട്ടികള്ക്കും പെണ്കുട്ടികള്ക്കും 10 സ്കൂളുകള് വീതമാണ് അനുവദിച്ചിട്ടുള്ളത്. അഞ്ച് സ്കൂളുകള് റിസര്വ് പട്ടികയിലും ഉള്പ്പെടുന്നുണ്ട്. കുടിവെള്ളം, ചുക്കുകാപ്പി തുടങ്ങിയവയും വിദ്യാര്ഥികള്ക്കായി ഒരുക്കും. എന്എസ്എസ്, എസ്പിസി വോളന്റിയര്മാരുടെ സാന്നിധ്യം 24 മണിക്കൂറും ഉറപ്പാക്കുമെന്ന് അധികൃതര് അറിയിച്ചു.
കെഎസ്ആര്ടിസി, റെയില്വേ സ്റ്റേഷന് എന്നിവിടങ്ങളില് ഹെല്പ് ഡെസ്കുകളും ഉണ്ടാകും. താമസകേന്ദ്രങ്ങളില്നിന്ന് മത്സരവേദിയിലേക്കും ഭക്ഷണശാലയിലേക്കും വാഹനസൗകര്യം ലഭ്യമാകും. എല്ലാ കേന്ദ്രങ്ങളിലും ശുചിത്വം ഉറപ്പാക്കുന്നതോടൊപ്പം പ്ലാസ്റ്റിക് ഒഴിവാക്കി ഗ്രീന് പ്രോട്ടോക്കോള് നടപ്പാക്കും. വ്യക്തിഗത ഇനങ്ങളെക്കാള് ഗ്രൂപ്പ് ഇനങ്ങളില് പങ്കെടുക്കാന് എത്തുന്നവര് താമസസൗകര്യം കൂടുതലായി ഉപയോഗിക്കുമെന്ന വിലയിരുത്തലിലാണ് ക്രമീകരണങ്ങള് ഒരുക്കിയിട്ടുള്ളത്.
