വ്യാജ ജിഎസ്ടി ഉദ്യോഗസ്ഥര്‍ പിടിയില്‍, പത്തനംതിട്ടയിലെ കച്ചവടക്കാരില്‍ നിന്നുമാത്രം തട്ടിയത് ലക്ഷങ്ങള്‍

പത്തനംതിട്ട: ജിഎസ്ടി ഉദ്യോഗസ്ഥരെന്ന വ്യാജേന വ്യാപാരസ്ഥാപനങ്ങളില്‍ നിന്ന് വന്‍ തുക തട്ടിയെടുക്കുന്ന സംഘം ക്രൈംബ്രാഞ്ചിന്‌റെ പിടിയിലായി. കോഴഞ്ചേരി സ്വദേശി ബിജോ മാത്യു (35), തിരുവനന്തപുരം സ്വദേശികളായ ഇമ്മാനുവല്‍ (42), ഡെന്നിസ് ജേക്കബ്(51) എന്നിവരാണ് അറസ്റ്റിലായത്. കോഴഞ്ചേരിയിലെ ഒരു ബേക്കറി ഉടമയ്‌ക്ക് സംശയം തോന്നി ജിഎസ്ടി ഇന്റലിജന്‍സ് ഡപ്യൂട്ടി കമ്മിഷണറെ അറിയിച്ചതോടെയാണ് സംഘം കുടുങ്ങിയത്.
ജിഎസ്ടി വകുപ്പ് റെയ്ഡ് നടത്തിയതും ലൈസന്‍സ് റദ്ദായതുമായ സ്ഥാപനങ്ങളെക്കുറിച്ച് വിവരങ്ങള്‍ ശേഖരിച്ച ശേഷം ഇത്തരം സ്ഥാപനങ്ങളില്‍ എത്തി വിശ്വാസമാര്‍ജിക്കുകയും കുടിശിഖ കുറവ് ചെയ്തു നല്‍കാമെന്നും മറ്റും പറഞ്ഞ് പണം തട്ടുകയുമായിരുന്നു ഇവരുടെ രീതി. കേരളത്തിലുടനീളം തട്ടിപ്പ് നടത്തി വന്ന സംഘത്തെയാണ് ജില്ലാ ക്രൈംബ്രാഞ്ച് ഡിവൈ.എസ്.പി കെ.ജി. അനീഷിന്റെ നേതൃത്വത്തില്‍ അറസ്റ്റ് ചെയ്തത്.
ജിഎസ്ടി ഇന്റലിജന്‍സ് സ്‌ക്വാഡിലെ ഉയര്‍ന്ന ഉദ്യോഗസ്ഥരാണ് തങ്ങളെന്നാണ് ഇവര്‍ കച്ചവടക്കാരെ വിശ്വസിപ്പിച്ചിരുന്നത്.
ജില്ലയില്‍ ഒരു ബേക്കറി ഉടമയില്‍ നിന്നും 15 ലക്ഷം രൂപയും ആശുപത്രി ഉടമയില്‍ നിന്നും 17 ലക്ഷം രൂപയും ക്വാറി ഉടമയില്‍ നിന്നും അഞ്ചു ലക്ഷവും ഫര്‍ണിച്ചര്‍ ഷോപ്പ് ഉടമയില്‍ നിന്നും ഏഴു ലക്ഷവും ഇവര്‍ തട്ടിയെടുത്തതായി വ്യക്തമായി.