കൊച്ചി: രാജ്യത്തേയും വിദേശത്തെയും യാത്രാ ടൂറിസം, ഹോസ്പിറ്റാലിറ്റി മേഖലകളിലെ പ്രമുഖരെ ഒരുമിപ്പിച്ച് ഇന്ത്യ ഇന്റര്‍നാഷണല്‍ ട്രാവല്‍ മാര്‍ട്ട് (ഐഐടിഎം) 2026 കടവന്ത്ര രാജീവ്ഗാന്ധി ഇന്‍ഡോര്‍ സ്റ്റേഡിയത്തില്‍ ആരംഭിച്ചു. 10 വരെയാണ് പ്രദര്‍ശനം. പതിനഞ്ചിലധികം സംസ്ഥാനങ്ങളില്‍ നിന്നും വിദേശ രാജ്യങ്ങളില്‍ നിന്നുമായി 100-ലധികം എക്‌സിബിറ്റര്‍മാര്‍ പങ്കെടുക്കുന്ന പ്രദര്‍ശനത്തില്‍ ടൂറിസം മലേഷ്യക്ക് പ്രധാന പങ്കാളിത്തമുണ്ട്.
ഉദ്ഘാടന ചടങ്ങില്‍ ജമ്മു കശ്മീര്‍ ടൂറിസം ഡെവലപ്മെന്റ് കോര്‍പ്പറേഷന്‍ മാനേജിങ് ഡയറക്ടര്‍ ശ്രേയ സിംഗാള്‍, മലേഷ്യ ടൂറിസം പ്രമോഷന്‍ ബോര്‍ഡ് ഡയറക്ടര്‍ ഹിഷാമുദ്ദീന്‍ ബിന്‍ മുസ്തഫ, രാജസ്ഥാന്‍ ടൂറിസം അഡീഷണല്‍ ഡയറക്ടര്‍മാരായ എക്ത കബ്ര, പവന്‍ കുമാര്‍ ജെയിന്‍; സ്ഫിയര്‍ ട്രാവല്‍മീഡിയ ആന്‍ഡ് എക്‌സിബിഷന്‍സ് ഡയറക്ടര്‍മാരായ സഞ്ജയ് ഹഖു, രോഹിത് ഹംഗല്‍ എന്നിവര്‍ ഉള്‍പ്പെടെ യാത്രാ വ്യവസായ രംഗത്തെ നിരവധി പ്രമുഖര്‍ പങ്കെടുത്തു.
ഐഎടിഒ കേരള ലക്ഷദ്വീപ് ചെയര്‍മാന്‍ മഞ്ജു ജോസഫ്, ടിഎഎഐ ചെയര്‍പേഴ്‌സണ്‍ മറിയമ്മ ജോസ്, ടിഎഎഫ്‌ഐ നാഷണല്‍ എംസി അംഗം പൗലോസ് മാത്യു, ടിഎഎഫ്‌ഐ ചെയര്‍മാന്‍ പി.പി. ഓഗസ്റ്റി, ടൂര്‍ ഓപ്പറേറ്റേഴ്സ് അസോസിയേഷന്‍ ഓഫ് ഇന്ത്യ പ്രസിഡന്റ് അബ്ദുല്‍ നാസര്‍, കേരള ട്രാവല്‍ മാര്‍ട്ട് സൊസൈറ്റി പ്രസിഡന്റ് ജോസ് പ്രദീപ്, സിഇഒ രാജ്കുമാര്‍ എന്നിവരും സന്നിഹിതരായിരുന്നു. ട്രാവല്‍ ഏജന്‍സികള്‍, ടൂര്‍ ഓപ്പറേറ്റര്‍മാര്‍, ഹോട്ടലുകള്‍ എന്നിവര്‍ക്കായുള്ള ഏറ്റവും വലിയ ബി2ബി വേദിയാണ് ഐഐടിഎം. ദേശീയ അന്താരാഷ്‌ട്ര ടൂറിസം, ലക്ഷ്വറി യാത്ര, ട്രാവല്‍ സാങ്കേതികവിദ്യ, സുസ്ഥിര ടൂറിസം, പരിഹാരങ്ങള്‍ എന്നിവയ്‌ക്കായി പ്രത്യേക പവലിയനുകളും ഒരുങ്ങിയിട്ടുണ്ട്.
