തിരുവനന്തപുരം: കോര്പ്പറേഷനിലെ അഞ്ച് സ്ഥിരം സമിതികളിലേക്കുള്ള അംഗങ്ങളുടെ തെരഞ്ഞെടുപ്പ് നാളെയും സ്റ്റാന്റിംഗ് കമ്മറ്റി ചെയര്മാന്മാരുടെ തെരഞ്ഞെടുപ്പ് 13, 14 തീയതികളിലായി നടക്കും. അധ്യക്ഷ സ്ഥാനത്തേക്കുള്ള തെരഞ്ഞെടുപ്പില് ബിജെപിയെ തോല്പ്പിക്കാന് കോണ്ഗ്രസും സിപിഎമ്മും ഒന്നിച്ച് അവിശുദ്ധ കൂട്ടുകെട്ടിനുള്ള നീക്കം തുടങ്ങി.
സ്ഥിരം സമിതികളിലേക്കുള്ള അംഗങ്ങളുടെ തെരഞ്ഞെടുപ്പില് മൂന്ന് സമിതികളുടെ തെരഞ്ഞെടുപ്പ് പൂര്ത്തിയായി. ക്ഷേമകാര്യ സമിതിയിലേക്ക് വോട്ടെടുപ്പ് ഇല്ലാതെ 13 അംഗങ്ങളെയും തെരഞ്ഞെടുത്തു. നികുതി അപ്പീല് കാര്യ സ്റ്റാന്ഡിംഗ് കമ്മറ്റി, നഗരാസൂത്രണകാര്യ സ്റ്റാന്ഡിംഗ് കമ്മിറ്റി എന്നിവയിലേക്ക് തെരഞ്ഞെടുപ്പ് നടത്തി അംഗങ്ങളുടെ എണ്ണം പൂര്ത്തിയായി.
നികുതി അപ്പീല്കാര്യ സമിതിയില് ബിജെപിക്കും എല്ഡിഎഫിനും അംഗങ്ങളുടെ എണ്ണം തുല്യമാണ്. അധ്യക്ഷയെ തെരഞ്ഞെടുക്കാന് നറുക്കെടുപ്പ് വേണ്ടി വരും. മൊത്തം12 അംഗങ്ങളാണുള്ളത്. ബിജെപി 5, എല്ഡിഎഫ് 5, യുഡിഎഫ് 2. സമിതി അധ്യക്ഷ സ്ഥാനം നേടിയെടുക്കാന് യുഡിഎഫ് അംഗങ്ങളെ ചാക്കിടാനുള്ള നീക്കത്തിലാണ് സിപിഎം. നഗരാസൂത്രണ സ്ഥിരം സമിതിയിലെ 12ല് ആറ് അംഗങ്ങളും ബിജെപിയാണ്. സ്വതന്ത്ര അംഗം പാറ്റൂര് രാധാകൃഷ്ണന് നഗരാസൂത്രണ സ്ഥിരം സമിതിയിലേക്കാണ് തെരഞ്ഞെടുത്തിരിക്കുന്നത്.
വിദ്യാഭ്യാസം കായികം, ധനകാര്യം, വികസനം, ആരോഗ്യം, മരാമത്ത് സ്റ്റാന്റിംഗ് കമ്മറ്റികളിലേക്കുള്ള അംഗങ്ങളുടെ എണ്ണം പൂര്ത്തിയാക്കാനുണ്ട്. തെരഞ്ഞെടുപ്പ് നാളെ നടക്കും. ബിജെപി ശാസ്തമംഗലം കൗണ്സിലര് ആര്. ശ്രീലേഖയുടെയും സിപിഎമ്മിലെ പുന്നയ്ക്കാമുകള് കൗണ്സിലര് ആര്.പി. ശിവജിയുടെയും വോട്ട് അസാധുവായി. രണ്ടുപേരും ബാലറ്റിന് പിറക് വശത്ത് ഒപ്പിട്ടില്ല.
സിപിഎം കൗണ്സില് പാര്ട്ടി ലീഡര് കൂടിയായ ശിവജിയുടെ വോട്ട് അസാധുവായത് പാര്ട്ടിയില് ആക്ഷേപം ഉയര്ന്നിട്ടുണ്ട്.
