തിരുവനന്തപുരം: കേന്ദ്രം സൗജന്യമായി നല്കിയ ലോ ഫ്ളോര് ബസുകള് കൃത്യമായി അറ്റകുറ്റപ്പണികള് നടത്താതെയും സ്പെയര് പാര്ട്ടുകള് മാറാതെയും നശിപ്പിച്ചു. ജവഹര്ലാല് നെഹ്റു നാഷണല് അര്ബന് റിന്യൂവല് മിഷന് (ജെഎന്എന്യുആര്എം) സ്കീമില് രണ്ടു ഘട്ടമായി നരേന്ദ്രമോദി സര്ക്കാര് 750 ബസ്സുകളാണ് കേരളത്തിനു സൗജന്യമായി നല്കിയത്.
260 വോള്വോ എസി ലോ ഫ്ളോര് ബസുകളും, അശോക് ലൈലാന്ഡ്, ടാറ്റാ കമ്പനികളുടെ 490 നോണ് എസി ലോ ഫ്ളോര് ബസുകളുമാണ് ലഭിച്ചത്. സിറ്റിയില് ഓടിക്കാന് സൗകര്യ പ്രദമായ ലോ ഫ്ളോര് ബസുകളായിരുന്നു അതില് ഭൂരിഭാഗവും. അത് ദീര്ഘദൂര സര്വീസ്സിന് ഉപയോഗിക്കാന് വേണ്ടി ആയിരുന്നില്ല. ദീര്ഘദൂര സര്വീസ് നടത്താനുള്ള ഘടനയായിരുന്നില്ല അവയ്ക്കുണ്ടായിരുന്നത്. എന്നാല് ലാഭം മാത്രം ലക്ഷ്യമിട്ട് എ സി ലോ ഫ്ളോര് ബസുകള് കേരളത്തിലങ്ങോളമിങ്ങോളം സര്വീസ് നടത്തി.
2014ലാണ് കേന്ദ്ര സര്ക്കാര് ലോ ഫ്ളോര് ബസുകള് കേരളത്തിന് നല്കിയത്. ലോ ഫ്ളോര് ബസുകളുടെ നടത്തിപ്പിനായി 2015ല് കെഎസ്ആര്ടിസിയുടെ കീഴില് കേരള അര്ബന് റോഡ് ട്രാന്സ്പോര്ട്ട് കോര്പ്പറേഷന് എന്നൊരു കമ്പനി രൂപികരിച്ചു. പ്രായമായവര് ഉള്പ്പടെയുള്ളവര്ക്ക് അനായാസമായി കയറാനും ഇറങ്ങാനും കഴിയുന്ന ബസുകള് വളരെ വേഗം തന്നെ കെഎസ്ആര്ടിസിയുടെ തിലകക്കുറിയായി മാറി. ആനുവല് മെയിന്റനന്സ് കോണ്ട്രാക്റ്റ് (എഎംസി) പ്രകാരം മൂന്നു വര്ഷം കമ്പനി സൗജന്യമായി സര്വീസ് ചെയ്തു നല്കി. എന്നാല് എഎംസി കാലാവധി കഴിഞ്ഞതോടെ സര്വീസിനും സ്പെയര് പാര്ട്ട്സുകള്ക്കും കെഎസ്ആര്ടിസി പണം നല്കാതായതോടെ അറ്റകുറ്റപ്പണികള് ചെയ്യാതെ ബസുകള് വര്ക്ക്ഷോപ്പിലായി. താല്ക്കാലിക ആവശ്യം നിറവേറ്റാന് ഒരു ബസില് നിന്നു സ്പെയര് പാര്ട്ട്സുകള് എടുത്ത് മറ്റു ബസുകളില് ഉപയോഗിക്കുന്നതും വ്യാപകമായി. അതോടെ കൂടുതല് ബസുകള് വര്ക്ക്ഷോപ്പില് കയറ്റേണ്ടി വന്നു.
ദാനം കിട്ടിയ ബസുകള് യഥാസമയം അറ്റകുറ്റപ്പണികള് നടത്താതെയും സ്പെയര് പാര്ട്ട്സുകള് മാറാതെയും നാശത്തിലേക്ക് തള്ളി. 2019ല് കൊവിഡിനെ തുടര്ന്നുണ്ടായ ലോക്ക്ഡൗണും ജനങ്ങള് പൊതുഗതാഗതത്തില് നിന്ന് അകന്നതും കൂടി ആയപ്പോള് ലോ ഫ്ളോര് ബസുകളുടെ പതനം പൂര്ത്തിയായി.
കേവലം പത്തു വര്ഷമായപ്പോള് തന്നെ ലോ ഫ്ളോര് ബസുകളില് പകുതിയിലധികവും കട്ടപ്പുറത്താക്കി. 250 എ സി ലോ ഫ്ളോര് ബസുകളില് വിരലിലെണ്ണാവുന്നവ മാത്രമാണ് ഇപ്പോള് സര്വിസ് നടത്തുന്നത്. അതുപോലെ തന്നെയാണ് നോണ് എ സി ലോ ഫ്ളോര് ബസുകളുടെ കാര്യവും. കോടികള് വിലവരുന്ന നൂറുകണക്കിന് ലോ ഫ്ളോര് ബസുകളാണ് വിവിധ ഡിപ്പോകളിലായി തുരുമ്പെടുത്ത് നശിച്ചുകൊണ്ടിരിക്കുന്നത്. യാര്ഡില് സ്ഥലമില്ലാതെ വരുമ്പോള് സ്ക്രാപ്പാക്കി വില്പ്പനയും നടത്തുണ്ട്.
ജന്മഭൂമി ഓണ്ലൈന്