ഗ്രാജ്വേറ്റ് ഫാര്‍മസി ആപ്ടിട്യൂഡ് ടെസ്റ്റ് (ജിപാറ്റ്-2026) മാര്‍ച്ച് 7ന്

ജനുവരി 12 വരെ ഓണ്‍ലൈനായി അപേക്ഷിക്കാം
വിശദവിവരങ്ങള്‍ https://natboard.edu.in ല്‍ ലഭിക്കും
‘ജിപാറ്റ്’ യോഗ്യത നേടുന്നവര്‍ക്ക് എംഫാം അഡ്മിഷനുംസ്‌കോളര്‍ഷിപ്പിനും അര്‍ഹത

ഭാരതത്തില്‍ എംഫാം പ്രവേശനത്തനും സ്‌കോളര്‍ഷിപ്പിനുമായുള്ള ദേശീയതല യോഗ്യതാനിര്‍ണയപരീക്ഷയായ ഗ്രാഡുവേറ്റ് ഫാര്‍മസി ആപ്ടിട്യൂഡ് ടെസ്റ്റ് (ജിപാറ്റ്-2026) മാര്‍ച്ച് 7 ന് നടത്തും. ഇതില്‍പങ്കെടുക്കുന്നതിന് ഓണ്‍ലൈനില്‍ ജനുവരി 12 നകം അപേക്ഷിക്കാം. നാഷണല്‍ ബോര്‍ഡ് ഓഫ് എക്‌സാമിനേഷന്‍സ് ഇന്‍ മെഡിക്കല്‍ സയന്‍സസിനാണ് (എന്‍ബിഇഎംഎസ്) പരീക്ഷാചുമതല. വിജ്ഞാപനവും വിവരണപത്രികയും https://natboard.edu.in- ല്‍ ലഭിക്കും.

പരീക്ഷാഫീസ്: ജനറല്‍, ഒബിസി/ഇഡബ്ല്യുഎസ് വിഭാഗങ്ങള്‍ക്ക് 3500 രൂപ. എസ്‌സി/എസ്ടി/പിഡബ്ല്യുഡി വിഭാഗങ്ങള്‍ക്ക് 2500 രൂപ മതി. ക്രഡിറ്റ്/ഡബിറ്റ് കാര്‍ഡ് മുഖേന ഫീസ് അടയ്‌ക്കാം. അപേക്ഷാസമര്‍പ്പണത്തിനുള്ള നിര്‍ദ്ദേശങ്ങള്‍, പരീക്ഷാഘടന, സിലബസ് മുതലായവ വിവരണ പ്രതികയിലുണ്ട്.

യോഗ്യത: അംഗീകൃത സര്‍വ്വകലാശാലയില്‍നിന്നും നേടിയ നാലുവര്‍ഷത്തെ ഫാര്‍മസി ബിരുദം/തത്തുല്യം. ഫൈനല്‍/പ്രീ-ഫൈനല്‍ ബിഫാം പരീക്ഷയെഴുതാന്‍ പോകുന്നവരെയും വ്യവസ്ഥകള്‍ക്ക് വിധേയമായി പരിഗണിക്കും. ബിഇ/ബിടെക് (ഫാര്‍മസ്യൂട്ടിക്കല്‍/കെമിക്കല്‍ ടെക്‌നോളജി/തത്തുല്യ യോഗ്യതയുള്ളവര്‍ക്ക് ജിപാറ്റ്-2026 അഭിമുഖീകരിക്കുന്നതിന് അര്‍ഹതയില്ല.

പരീക്ഷ: മാര്‍ച്ച് 7ന് നടത്തുന്ന കമ്പ്യൂട്ടര്‍ അധിഷ്ഠിത ഫാര്‍മസി ബിരുദ നിലവാരത്തിലുള്ള ഇനിപറയുന്ന വിഷയങ്ങളില്‍ ഒബ്ജക്ടീവ് മള്‍ട്ടിപ്പിള്‍ ചോയിസ് മാതൃകയിലുള്ള ചോദ്യങ്ങളുണ്ടാവും- ഫാര്‍മസ്യൂട്ടിക്കല്‍ കെമിസ്ട്രി ആന്‍ഡ് അലൈഡ് വിഷയങ്ങള്‍-38 ചോദ്യങ്ങള്‍, 152 മാര്‍ക്ക്; ഫാര്‍മസ്യൂട്ടിക്‌സ് ആന്‍ഡ് അലൈഡ് വിഷയങ്ങള്‍ 38/152, ഫാര്‍മകോഗ്‌നസി ആന്‍ഡ് അനുബന്ധ വിഷയങ്ങള്‍ 10/40, ഫാര്‍മക്കോളജി/അനുബന്ധ വിഷയങ്ങള്‍ 28/112, ഫാര്‍മസിഅധിഷ്ഠിതമായ മറ്റ് വിഷയങ്ങള്‍ 11/44. ആകെ 125 ചോദ്യങ്ങള്‍, പരമാവധി 500 മാര്‍ക്ക്. ശരി ഉത്തരത്തിന് 4 മാര്‍ക്ക്, ഉത്തരം തെറ്റിയാല്‍ ഒരു മാര്‍ക്ക് വീതംകുറയ്‌ക്കും.

കേരളത്തില്‍ എറണാകുളം, കോട്ടയം, കോഴിക്കോട്, മലപ്പുറം, തൃശൂര്‍ നഗരങ്ങളില്‍ പരീക്ഷാകേന്ദ്രങ്ങളുണ്ടാവും. കൂടുതല്‍ വിവരങ്ങള്‍ക്കും അപ്‌ഡേറ്റുകള്‍ക്കും വെബ്‌സൈറ്റ് സന്ദര്‍ശിക്കേണ്ടതാണ്.