ന്യൂദല്ഹി: ഒന്നര വര്ഷത്തിനിടെ പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള കേന്ദ്രസര്ക്കാര് അനുമതി നല്കിയത് 12.6 ലക്ഷം കോടി രൂപയുടെ അടിസ്ഥാന സൗകര്യ വികസന പദ്ധതികള്ക്ക്. 2024 ജൂണ് മുതല് 2025 ഡിസംബര് വരെയുള്ള കാലയളവിലാണ് കേന്ദ്രമന്ത്രിസഭായോഗം ഈ പദ്ധതികള്ക്ക് അംഗീകാരം നല്കിയത്. രാജ്യത്തിന്റെ അടിസ്ഥാനസൗകര്യ വികസന രംഗത്ത് വന് കുതിച്ചു ചാട്ടമുണ്ടാക്കുന്നതാണ് ഇവ.
രാജ്യത്തെ റെയില്വേയുടെ മുഖച്ഛായ മാറ്റിമറിച്ച 1,52,583 കോടി രൂപയുടെ 43 റെയില്വേ പദ്ധതികള്, 2,18,312 കോടി രൂപയുടെ 24 ഹൈവേ പദ്ധതികള്, 1,31,542 കോടി രൂപയുടെ എട്ട് മെട്രോ റെയില് പദ്ധതികള് എന്നിവയ്ക്ക് ഈ കാലയളവില് മന്ത്രിസഭായോഗം അംഗീകാരം നല്കി. നാല് പുതിയ വിമാനത്താവളങ്ങള്ക്കായി 7,339 കോടി, ഒരു പ്രധാന തുറമുഖം ഉള്പ്പെടെ ഷിപ്പിങ് മേഖലയിലെ വികസനത്തിനായി 1,45,945 കോടി, രണ്ട് പുതിയ റോപ്പ്വേയ്ക്ക് 6,811 കോടി, മൂന്ന് അണക്കെട്ടുകള് ഉള്പ്പെടെയുള്ളവയ്ക്കായി (ബജറ്റ് വിഹിതം അടക്കം) 28,432 കോടി, 12 ഇന്ഡസ്ട്രിയല് സ്മാര്ട്ട് സിറ്റികള്ക്കായി 28,602 കോടി രൂപയുടെ പദ്ധതി എന്നിവയ്ക്കും അനുമതി നല്കി. വീടെന്ന പാവപ്പെട്ടവരുടെ സ്വപ്നം സാക്ഷാത്കരിച്ച പ്രധാനമന്ത്രി ആവാസ് യോജനയില്പ്പെട്ട 5,36,137 കോടി രൂപയുടെ പദ്ധതികള്ക്കാണ് ഒന്നരവര്ഷത്തിനിടെ കേന്ദ്രമന്ത്രിസഭാ യോഗം അംഗീകാരം നല്കിയത്.
പ്രധാനമന്ത്രി ആവാസ് യോജന-ഗ്രാമീണ് പദ്ധതി പ്രകാരം ആകെ 4.95 കോടി വീടുകള് നിര്മിക്കാനാണ് ലക്ഷ്യമിടുന്നത്. 2025 ആഗസ്ത് വരെ 4.12 കോടി വീടുകള് അനുവദിച്ചു. പദ്ധതി പ്രകാരം ഇതുവരെ 2,68,480 ഭൂരഹിത ഗുണഭോക്താക്കള്ക്കും വീടുകള് അനുവദിച്ചിട്ടുണ്ട്.
