ന്യൂദല്ഹി: ഇന്ത്യന് മഹാസമുദ്രത്തിലെ തന്ത്രപ്രധാനമായ കാര് നിക്കോബാര് വ്യോമതാവളത്തില് നവീകരിച്ച റണ്വേ ജനുവരി 2 ന് സംയുക്ത സൈനിക മേധാവി (സിഡിഎസ്) ജനറല് അനില് ചൗഹാന് ഉദ്ഘാടനം ചെയ്യും. ആഗോള സമുദ്ര വ്യാപാരത്തിന്റെ സിരാകേന്ദ്രമായ മലാക്ക കടലിടുക്കിന് തൊട്ടടുത്ത് സ്ഥിതി ചെയ്യുന്ന കാര് നിക്കോബാറിലെ സൗകര്യങ്ങള് വര്ധിപ്പിക്കുന്നത് മേഖലയിലെ ഭാരതത്തിന്റെ സൈനിക മേധാവിത്വം ഉറപ്പിക്കാന് സഹായിക്കും.
ആന്ഡമാന് നിക്കോബാര് കമാന്ഡിന് കീഴിലുള്ള 37 വിങ് എയര്ഫോഴ്സ് ബേസിലാണ് വിപുലമായ നവീകരണ പ്രവര്ത്തനങ്ങള് പൂര്ത്തിയായത്. റണ്വേയുടെ ഉപരിതലം ബലപ്പെടുത്തിയതിന് (റീ-സര്ഫസിങ്) പുറമെ, കൂടുതല് യുദ്ധവിമാനങ്ങളെ ഉള്ക്കൊള്ളാനും വേഗത്തില് തിരിച്ചുവിടാനും കഴിയുന്ന തരത്തില് ഏപ്രണ് ഏരിയ വിപുലീകരിച്ചിട്ടുണ്ട്. അടിയന്തര സാഹചര്യങ്ങളില് ‘സെക്കന്ഡറി റണ്വേ’ ആയി ഉപയോഗിക്കാന് പാകത്തിന് ടാക്സി ട്രാക്കും നവീകരിച്ചിട്ടുണ്ട്.
ഉദ്ഘാടനത്തിന് പിന്നാലെ സുഖോയ്-30 എംകെഐ യുദ്ധവിമാനങ്ങള് ഇവിടെ നിന്ന് നിരീക്ഷണ പറക്കല് ആരംഭിക്കും. തുടര്ന്ന് മിറാഷ് യുദ്ധവിമാനങ്ങളും ഇവിടേക്ക് മാറ്റാന് പദ്ധതിയുണ്ട്. ദീര്ഘദൂര ആക്രമണ ശേഷി വര്ദ്ധിപ്പിക്കുക, മിസൈല് പരീക്ഷണങ്ങള്ക്ക് സൗകര്യമൊരുക്കുക, കിഴക്കന് സൈനിക മേഖലയിലെ (ഈസ്റ്റേണ് തിയേറ്റര്) ദ്രുതഗതിയിലുള്ള സൈനിക പ്രവര്ത്തനങ്ങള് ഏകോപിപ്പിക്കുക എന്നിവയാണ് നവീകരണത്തിലൂടെ വ്യോമസേന ലക്ഷ്യമിടുന്നത്. കേന്ദ്ര ആഭ്യന്തര മന്ത്രി അമിത് ഷായും ജനുവരി 2ന് ദ്വീപ്
സന്ദര്ശിക്കുന്നുണ്ട്.
