ആലപ്പുഴ: ഹോമിയോ ഔഷധ നിര്‍മാണ മേഖലയിലെ പൊതുമേഖലാ സ്ഥാപനമായ പാതിരപ്പള്ളിയിലെ ഹോംകോയുടെ പ്രവര്‍ത്തനം താളംതെറ്റുന്നു. ഗുണനിലവാരം ഇല്ലാത്ത ലാക്ടോസ് ഉള്‍പ്പടെയുള്ള അസംസ്‌കൃത വസ്തുക്കള്‍ വാങ്ങി ഉത്പാദിപ്പിച്ച് വിതരണം ചെയ്ത മരുന്നുകള്‍ കേടായതിനെ തുടര്‍ന്ന് ഫാര്‍മസിയിലെ ടാബ്ലറ്റ് സെക്ഷനിലെ ഉത്പാദനം കഴിഞ്ഞ ഒരു മാസമായി നിര്‍ത്തിവെച്ചു. ഇതിന് കാരണക്കാരായ ഉദ്യോഗസ്ഥര്‍ക്കെതിരെ ഹോംകോ എംഡി നടപടി സ്വീകരിക്കാത്തത് ദുരൂഹമാണെന്ന് ആക്ഷേപമുയരുന്നു.
നൂറില്‍പരം ഹോമിയോ ഡിസ്പന്‍സറികളിലേക്ക് അയച്ച ടാബ്ലറ്റുകള്‍ പൂപ്പല്‍ പിടിച്ച് കേടായതിനാല്‍ തിരിച്ചയക്കുകയും ഡിസ്പന്‍സറികളുടെ ദൈനംദിന പ്രവര്‍ത്തനത്തെ ബാധിക്കുകയും ചെയ്തു. ഇവ മാറി നല്‍കേണ്ട അവസ്ഥയാണ്. ഇത് സ്ഥാപനത്തിന് കോടികളുടെ നഷ്ടം ഉണ്ടാക്കും. ഹോംകോയുടെ ഗുണനിലവാര പരിശോധനാ വിഭാഗം പൂര്‍ണ പരാജയമാണെന്ന് ഇത് വ്യക്തമാക്കുന്നു.
സ്ഥാപനത്തിനുണ്ടായ സാമ്പത്തിക നഷ്ടം ഹോംകോ എംഡിയില്‍ നിന്ന് ഈടാക്കണമെന്നും ഹോംകോ എംപ്ലോയീസ് അസോസിയേഷന്‍ പ്രസിഡന്റ് എ.എ. ഷുക്കൂര്‍ ആവശ്യപ്പെട്ടു. സ്ഥാപനത്തിന്റെ നിലനില്‍പ്പിനേയും സത്കീര്‍ത്തിയേയും സാധാരണ ജനങ്ങളുടെ ആരോഗ്യത്തേയും ബാധിക്കുന്നതിനാല്‍ സര്‍ക്കാരും ഹോമിയോ വകുപ്പും അടിയന്തരമായി അന്വേഷണം നടത്തി കുറ്റക്കാര്‍ക്കെതിരെ നടപടി എടുക്കണം. ആയുഷ് സെക്രട്ടറിയുടെ അധ്യക്ഷതയില്‍ കൂടിയ ത്രികക്ഷി യോഗത്തിലെ തീരുമാനം ഒന്നും തന്നെ നടപ്പാക്കാത്തതിനാല്‍ ജീവനക്കാരുടെ പ്രതിഷേധത്തെ തുടര്‍ന്ന് ഭരണകക്ഷി യൂണിയന്‍ വീണ്ടും പണിമുടക്ക് നോട്ടീസ് നല്‍കിയിരിക്കുകയാണ്.
